தேடலும் தெரிதலும் தெளிதலும் யாவர்க்கும் சிறப்பே.

புலம்பெயர்வில் பெண்கள்

இறக்கை விரித்த விமானம் அதில்

சிறக்கப் பறந்தனர் தமிழ் பெண்கள்

தாயாய் தாரமாய் சேயாய் தளமிறங்கிப்

புகலிடத்தில் இணைப் பாதங்கள் பதித்தனர்

காற்சட்டைக்குள் கால்கள் அடங்கின 

கலாச்சாரக் காப்பாளர் கடிந்து கொட்டினர்.

வாழ்வாங்கு வாழ வகுத்த நெறிகளில் - அவர்

வாழ்நாட்டில் வாழ வசப்படவில்லை.

நறவம் அனைய நலங்கள் அணுகாது

மாமேரு அனைய பாரங்கள் சுமந்தனர்

கொட்டும் பனியில் கூதல் குளிரில் 

சொட்டும் வியர்வை சுகமே சுமந்து

பூங்கொடி பூத்துக் குலுங்கிய பாரம் 

தாங்கியபோதும் வருந்தாது மலர்ந்து நின்றன்ன

கடுங்குளிர் நடுக்கத்தில் காதலன் தனக்கு

நடுங்கு குளிர்காட்டாத் தகைசால் பூங்கொடியானார்

இரத்த உறவுகளே ஈன்ற என்தாயே – என்

இதயத்தை இனங்காணுங்கள் என இறைஞ்சியதில்லை

வெத்திலை வாய்சிவத்த வேலம்மா பாட்டியும்

அதரத்தில் அரிதாரம் அழகாய்ப் பூசி

கதிரவன் கரந்தொடுமுன் கழிவறைத் தொழிலுக்காய்

கதியாய் நடக்கின்றாள், கடமை கருதியதாய்.

மலருக்குமலர் தாவும் மணவாளன் மாங்கல்யந்தாங்கி

புலத்திற்பூத்த மடந்தையரோ மனமிழந்து மடிந்ததில்லை

வடுக்களில்லா வாழ்வைக் கெடுக்க யார்வரினும்

விடுத்தவர் துணையில் விடுதலை பெற்றிடுவார்

தாயகமும் புகலிடமும் இருகண்களாய்

கங்குலும் கதிரொளியும் கருதாது கடமையில்

களித்திருக்கும் காரிகையரே வாழி நீவீர்

புகலிடத்தில் புதுமைகள்பல காட்டிட வாரீர்.