• நுழைவாயிலில்
  • என் அகம்
  • கட்டுரைகள்
  • இலக்கியங்கள்
  • வாழ்த்துக்கள்
  • விமர்சனங்கள்
  • சிறப்பு
  • வணக்கம் எனது படைப்புக்கள் உங்களை வரவேற்கிறது . வாசித்து உங்கள் எண்ணங்களை இதில் பதிவிடுங்கள்

    வியாழன், 30 ஜூன், 2022

    கர்ப்பக்கிரக ஆய்வுகூட அன்பளிப்பு


    கழுத்தில் தாலி ஏறிவிட்டால் புதுமணத் தம்பதிகளிடம் கேட்கும் அடுத்த கேள்வியாக அமைவது வயிற்றில் பூச்சி புழுக்கள் இல்லையா? என்பதே. இந்தக் கேள்வி தமிழர்கள் மத்தியில் கலாசாரமாகவே இருக்கின்றது. திருமணம் மூலம் அங்கீகாரம் வழங்கி அவர்களை இனத்தின் விருத்திக்குத் தயாராகச் செய்யும் கடமை தம்மிடம் இருப்பதாக பெரியவர்கள் கருதுகின்றார்கள். அந்தக் கருக்கட்டல் சரியான முறையில் ஏற்படுவதற்கும் அக்கருவைச் சரியான முறையில் வளர்த்தெடுப்பதற்கும் உரிய ஆலோசனைகளை வழங்குவதும் அவர்களின் கடமையாக இருக்கின்றது. முதல் இராத்திரிக்கு நாள் குறித்துக் கொடுப்பதும் இல்லையென்றால் தேனிலவுக்கு தம்பதியினரை அனுப்பி வைப்பதும் ஒரு ஆரோக்கியமான குழந்தையை உலகத்துக்கு பெற்றுக் கொடுக்கும் நோக்கமாக அமைகின்றது. இச்செயற்பாடு எந்த அளவிற்கு இளந் தலைமுறையினரால் ஏற்றுக் கொள்ளப்படுகின்றது என்பது தற்காலத்தில் கேள்விக்குறியாக இருந்தாலும் முறையற்ற உறவுகளால் கருத்தரித்தல் ஏற்படுவது இக்காலத்தில் சர்வசாதாரணமாக இருக்கின்றது. இதனால் கருச்சிதைவுகள் நடைபெறுவதையும் காணக்கூடியதாக இருக்கின்றது. உருவான குழந்தையை வைத்தியசாலையில் சத்திரசிகிச்சை மூலமோ வீட்டில் மருத்துவச்சியை அழைத்தோ குழந்தைப் பேறை கவனமாகச் செய்கின்ற முறை ஐரோப்பிய நாட்டிலும் இருக்கின்றது. 

    குழந்தை வயிற்றில் உருவாவதற்கு எடுக்க வேண்டிய முயற்சிகள், எப்படி வளர்கின்றது, எவ்வாறு வளர்த்தெடுக்கப்படுகின்றது. ஏன் பிள்ளைக்குக் குறைபாடுகள் ஏற்படுகின்றன. பிள்ளையை எப்படி வெளியே இலகுவாக எடுப்பது. கருசசிதைவு செய்வது என்பன பற்றி நற்றிணை, புறநானூறு, திருமந்திரம், குறுந்தொகை, பட்டினத்தார் பாடல்கள், போன்ற பல பாடல்களிலே எடுத்துக் காட்டப்பட்டுள்ளன. 

    அக்குழந்தை கருவாகின்ற காலத்திலே புல்லுக்கு மேலே விழுந்த பனித்துளியின் அளவிற்கு அந்த கரு இருக்கும் என்று அருணகிரிநாதர் தன்னுடைய திருப்புகழிலே பாடியிருக்கின்றார்.

    அறுகுநுனி பனியணைய சிறிய துளி

    பெரியதொரு ஆகமாகி என்கிறார். 

    இதனைப் பட்டினத்தார் பாடுகின்ற போது 


    "ஒருமட மாதும் ஒருவனுமாகி இன்ப சுகம்தரும் அன்பு பொருந்தி

    உணர்வு கலங்கி ஒழுகிய விந்து ஊறு சுரோணிதம் மீது கலந்து

    பனியில் ஓர் பாதி சிறு துளி மாது பண்டியில் வந்து புகுந்து திரண்டு

    பதும அரும்பு கமடமி தென்று பார்வை மெய் வாய் செவி கால் கைகள் என்று

    உருவமும் ஆகி உயர வளர் மாதம் ஒன்பதும் ஒன்றும்

    நிறைந்து மடந்தை உதரம் அகன்று புவியில் விழுந்து

    ஓரறிவு ஈரறிவாகி வளர்ந்து"

    என்று பாடிச் செல்கின்றார்  


    இதனையே திருவாசகத்திலே அற்புதமாக கரு உருவாகி குழந்தையாக பிறப்பது பற்றி மாணிக்கவாசகர்  பாடுகின்றார். 

    மானுடப் பிறப்பினுள் மாதா வுதரத்

    தீனமில் கிருமிச் செலவினிற் பிழைத்தும்

    ஒருமதித் தான்றியின் இருமையிற் பிழைத்தும்

    இருமதி விளைவின் ஒருமையிற் பிழைத்தும்

    மும்மதி தன்னுள் அம்மதம் பிழைத்தும்

    ஈரிரு திங்களிற் பேரிருள் பிழைத்தும்

    அஞ்சு திங்களின் முஞ்சுதல் பிழைத்தும்

    ஆறு திங்களில் ஊறலர் பிழைத்தும்

    ஏழு திங்களில் தாழ்புவி பிழைத்தும்

    எட்டுத் திங்களில் கட்டமும் பிழைத்தும்

    ஒன்பதில் வருதரு துன்பமும் பிழைத்தும்

    தக்க தசமதி தாயொடு தான்படும்

    மனிதப் பிறப்பிலே தாயின் வயிற்றிலே கருவுறுகின்ற போது அதனை அழிப்பதற்குச் செய்யும் குறைவில்லாத புழுக்களின் போருக்குத் தப்பியும், முதல் மாதத்தில் தான்றிக்காய் அளவுள்ள கரு இரண்டாகப் பிரிவு படாமல் தப்பியும், இரண்டாம் மாதத்தில் நடக்கின்ற காரியங்களாலே உருக்கெடுவதிலிருந்து தப்பியும், மூன்றாம் மாதத்தில் தாயின் மதநீர்ப் பெருக்குக்குத் தப்பியும், நான்காவது மாதத்தில் அம்மத நீர் நிறைவினால் உண்டாகும் பெரிய இருளுக்குத் தப்பியும், ஐந்தாவது  மாதத்தில் உயிர் பெறாது இறப்பதிலிருந்து தப்பியும், ஆறாம் மாதத்தில் கருப்பையில் சொறி மிகுதியால் உண்டாகிய துன்பத்தினின்று தப்பியும், ஏழாவது மாதத்தில் கருப்பை தாங்காமையால் பூமியில் காயாய் விழுவதனின்று தப்பியும்(குறைப்பிரசவம்), எட்டாவது மாதத்தில் வளர்ச்சி நெருக்கத்தினால் உண்டாகும் துன்பத்தினின்று தப்பியும்(இட நெருக்கடி), ஒன்பதாவது மாதத்தில் வெளியே வர முயல்வதால் வருந்துன்பத்தினின்று தப்பியும், குழவி வெளிப்படுதற்குத் தகுதியாகிய பத்தாவது மாதத்திலே தாய் படுகின்ற கடல் போன்ற துன்பத்தோடு துயரத்தினின்று தப்பியும், பூமியிற்பிறக்கின்றது. 

    இவ்வாறு பிறக்காது காந்தபுரத்து மன்னன் மகள் பிரசவ வேதனையால் துடித்தபோது நறையூர் மருத்துவச்சி அவளுடைய வயிற்றைக் கிழித்து குழந்தையை எடுத்ததாகக் கொங்கு மண்டல சதகம் 92 ஆவது பாடலிலே பாடப்பட்டுள்ளது. இந்நூல் 11 ஆம் நூற்றாண்டு எழுதப்பட்டது. 

    குறைவறு தெண்ணீர் நதியணை காந்தபுரத் தொரு நல்

    லிறை மகளார் மக வீனப் பொறாதுட லேங்க வகிர்

    துறை வழி பேற்று மகிழ்வூட்டு மங்கல தோன்றி வளர்

    மறைவழி நேர் நறையூர்நாடு சூழ் கொங்கு மண்டலமே  

    என அறுவைச்சிகிச்சை மூலம் குழந்தை பிறந்த செய்தி கூறப்பட்டுள்ளது. 

    இவ்வாறு பெற்றெடுக்கும் பிள்ளைகளைக் கருச்சிதைப்பது பற்றிக் கூறும் போது இது ஒரு பாவச் செயல் எனவும் மருத்துவர்களோ மற்றவர்களோ அதற்கு ஊக்கமளிக்கக் கூடாது என புறநானூற்றுப் பாடல் எடது;துரைப்பதில் இருந்து அக்காலத்தில் கருச்சிதைவுமுறை  நடைபெற்றிருக்கின்றது என்பதை அறியக் கூடியதாக இருக்கின்றது. 

    கருப்பை என்பது கர்ப்பக்கிரகம் போன்றது. அங்கு பரிசுத்தமான ஒரு உயிர் உற்பத்தி நடைபெறுகின்றது. ஆணும் பெண்ணும் தம்முடைய எதிர்கால வாரிசை உருவாக்க எடுக்கும் முயற்சியின் ஆய்வுகூடம். இதனாலேயே  இக்கரு வளர்ச்சி சிறப்பாக அமைய என்ன செய்ய வேண்டும் என்பது பற்றி பழைய தமிழ் இலக்கியங்கள், சித்தர் பாடல்கள் அற்புதமாக எடுத்துக்காட்டியிருக்கின்றன. 

    இது ஆனி மாத வெற்றிமணி பத்திரிகையில் வெளியானது 


    வியாழன், 12 மே, 2022

    தமிழ்க் கடவுள் முருகன் - எழுத்தாளர் இராஜேஸ்வரி பாலசுப்பிரமணியம்

     






    சித்திரைப் பெருமகனார் முன்னாள் அமைச்சர் செல்லையா இராஜதுரை

     


                      


    காலம் மாறலாம். கருத்துக்கள் மாறலாம், கலாசாரம் மாறலாம், வாழ்க்கை மாறலாம், வாழும் முறைகள் மாறலாம் - ஆனால் மாறாது மனிதன் மனதில் பதிந்து இருக்க வேண்டிய மாபெரும் பண்பு நன்றியென்னும் பண்பு. இது வானத்தை விடப் பெரிது, பூமியைவிடப் பெரிது, எழுமை எழுபிறப்பும் உள்ளுவர் தங்கண் விழுமந் துடைத்தவர் நட்பு. ஒருவருக்கு உதவி செய்ததன் மூலம் தன்னுடைய துன்பத்தை நீக்கியவர்களின் நட்பை, அடுத்த அடுத்த பிறவிகளிலும் நினைத்துப் போற்றுபவர்களே உண்மையான சான்றோர்கள் என்பார் வள்ளுவர். அந்த வகையிலே கிழக்கின் மைந்தனும், தமிழின் ஒளியும், பேச்சாற்றலின் சிகரமும், ஆன்மீகவாதியும், இலக்கிய கர்த்தாவுமாகிய முன்னாள் அமைச்சர் கலாநிதி செல்லையா இராஜதுரை அவர்களை கெரவிக்கும் முகமாக தமிழ் வான் அவையின் 23 ஆவது மாதாந்த இணையவழி பன்னாட்டு இலக்கியச் சந்திப்பிலே சித்திரைப் பெருமகனாராக இணைந்திருக்கின்ற ஐயா செல்லையா இராஜதுரை அவர்களையும் அவர்தம் குடும்பத்தினரையும் வணங்கி மகிழுகின்றேன். இன்றைய நிகழ்வில் கலந்து சிறப்பிப்பதையிட்டு பெருமகிழ்ச்சி கொண்டு வருக வருக என்று வரவேற்கின்றேன். 

    இந்நிகழ்ச்சியில் சிறப்புப் பேச்சாளர்களாக இலங்கையில் இருந்து இணைந்திருக்கின்ற தேசிய இளைஞர் சேவைகள் மன்றத்தின் முன்னாள் உதவிப் பணிப்பாளர் தம்பிராஜா ஈஸ்வரராஜா அவர்களையும், எழுத்தாளர் தவராஜா இராஜேந்திரன் அவர்களையும், பிரான்சிலிருந்து கலந்து கொண்டிருக்கும் எழுத்தாளர் எம்.ஆர்.ஸ்ராலின் ஞானம் அவர்களையும் வணங்கி மகிழுகின்றேன். வருக வருக என்று வரவேற்று மகிழுகின்றேன்

    இலங்கையில் இருந்து வருகை தந்திருக்கும் பேராசிரியர் மௌனகுரு சின்னையா அவர்களையும், சுவாமி விபுலானந்த அழகியற்கற்கை நிறுவகம் கிழக்குப் பல்கலைக்கழக பணிப்பாளர் பாரதி கென்னடி அவர்களையும் சிரேஷ்ட விரிவுரையாளர் உஷாந்தி துரைசிங்கம் அவர்களையும், ஏறாவூர் தமிழ் மகாவித்தியாலய அதிபர் சுதாகரி அவர்களையும், களுவாஞ்சிக்குடி முன்னாள் நூலகர் ரமணி ஜெயபாலன் அவர்களையும்,  அத்துடன் அவுஸ்திரேலியாவில் இருந்து வருகை தந்திருக்கின்ற பாடுமீன் ஸ்ரீகந்தராஜா அவர்களையும், இங்கிலாந்திலிருந்து கலந்து கொண்டிருக்கும் எழுத்தாளர் இராஜேஸ்வரி பாலசுப்பிரமணியம் அவர்களையும், செய்தியாளர் சீவகன் அவர்களையும், எழுத்தாளர் கோவிலூர் செல்வராஜா அவர்களையும், கனடாவில் இருந்து கலந்து கொண்டிருக்கும் சிந்தனைப்பூக்கள் பத்மநாதன் அவர்களையும், ஜெர்மனியில் இருந்து கலந்து கொண்டிருக்கின்ற எழுத்தாளர் புத்திசிகாமணி அவர்களையும், தம்பிராஜா பவானந்தராஜா அவர்களையும்,  எழுத்தாளர் ஜெகதீஸ்வரி மகேந்திரன் அவர்களையும்.. .. .. .. .. .. .. டென்மார்க் இலிருந்து நன்றியுரையாற்ற வந்திருக்கின்ற கலாநிதி ஜீவகுமாரன் அவர்களையும் என் கண்களுக்கு அகப்படாது தவறிவிடப்பட்ட அனைவரையும் அன்புடன் இருகரம் கூப்பி வணக்கத்தைத் தெரிவித்துக் கொள்ளுகின்றேன். வருக வருகவென்று வரவேற்று மகிழுகின்றேன் 

    இலக்கியம், இலக்கிய கர்த்தாக்கள், இலக்கியம் சார்ந்த இசை, நடனம், நாட்டுக்கூத்து, போன்ற கலைகள் என்று தடம் பதிக்கும் எங்களுடைய தமிழ் வான் அவையிலே இம்முறை சிறந்த அரசியல் வாதியும், இலக்கிய பேச்சாளரும், ஊடகவியலாளருமான ஐயாவைக் கௌரவிப்பதில் மீண்டும் மீண்டும் பெருமை கொள்ளுகின்றது இந்தத் தமிழ் வான் அவை. 

    ஐயாவுக்கு 295 வயதாகின்றது. இந்த மேடை அரசியல் மேடை அல்ல என்பதை நாம் எல்லோரும் மனதிலே பதித்துக் கொள்வோம். அவருடைய சமூகப்பணி, அவருடைய ஆற்றல்கள், திறமைகள், அவரால் நீங்கள் பெற்ற அனுபவங்கள் சாதகங்கள், இவை பற்றிப் பேசுவதன் மூலம் அவரைக் கௌரவித்து மகிழுவோம். அவரின் மனதிலே மகிழ்ச்சியை ஏற்படுத்துவோம். உரையாளர்களையும், நடனம், இசை, கவிதை என்று என்னால் இயன்றவரை ஒழுங்குபடுத்தியுள்ளேன். ஐயாவினுடைய இரண்டு புத்தகங்களை அவருடைய மகள் பூங்கோதை அவர்கள் அனுப்பியிருந்தார். அதன் உதவியுடன் ஐயாவைப் பற்றிய ஒரு காணொளி செய்திருக்கின்றேன். அதற்கு அவருக்கு நன்றியைத் தெரிவித்துக் கொள்ளுகி;ன்றேன். ஐயா மலேசியாவில் இருந்து ஆற்றிய உரையினை பத்மநாபன் காண்டீபன் அவர்கள் அனுப்பியிருந்தார். அவருக்கு நன்றியைத் தெரிவித்து அதில் ஒரு 6 நிமிடங்கள் வெட்டி உங்களுக்கு ஒளிபரப்புகின்றேன். 

    கருத்துரை பகிர்ந்து கொள்வதற்குப் பலர் இங்கு வந்து அமர்ந்திருக்கின்றார்கள். ஐயா கலாநிதி செல்லையா இராஜதுரை அவர்களுக்கும் எல்லோருக்கும் இன்றைய நாள் மறக்க முடியாத மகிழ்ச்சியை ஏற்படுத்தும் நல்லநாளாக அமையும் என்ற நம்பிக்கையுடன் உங்களுடைய ஒத்துழைப்பையும் தயவுடன் வேண்டி இன்றைய நிகழ்வை ஆரம்பிக்கின்றேன். 



    புதன், 11 மே, 2022

    இன்பத் தமிழும் நாமும் sTs தொலைக்காட்சியில் வாசித்த கவிதை



    கன்னித் தமிழே நீ காவியத்தில் புரண்டெழுந்தாய்

    காளமேகம், கம்பனெனும் கவிஞர்கள் நாவினிலே நடம்புரிந்தாய்

    சங்கத்துச் சான்றோர்கள் சபைதனிலே ஆட்சி செய்தாய்

    நக்கீரன் சொற்களிலே வற்றாத நதியானாய்

    கோவை உலா அந்தாதியென எமை ஆற்றுப்படுத்தினாய் 

    கலம்பகத்தில் களித்து நின்றாய் பாரதியில் மயங்கிநின்றாய்

    வள்ளுவன் வாக்கினுக்கு சாவா மருந்தளித்தாய் - இன்று 

    என் நாவினிலே எழுந்தருளி நா இனிக்க நான் பாட 

    தேன் இனிக்க விருந்தாகி தெவிட்டாத துணையாக வருவாய் 

    தமிழே உனக்கு முதல் வணக்கம்


    அன்னைத் தமிழை அரியணையேற்றி அழகுபார்க்கும்

    எஸ்.ரி.எஸ் தொலைக்காட்சியினருக்கும் வணக்கம் 

    அரங்கம் அதிரும் தமிழை அழகாய் அதிரவைக்கும்

    தொகுப்பாளர் சின்னராசா கணேஸ் அவர்களுக்கும் வணக்கம்

    அன்னைத் தமிழை அழகொழுக அடுக்கி வைக்க

    வண்ணமாய் வந்தமர்ந்த கவிஞர்களுக்கும் வணக்கம் 

    முத்தான தமிழை சொற்சித்திரமாய் சொல் தொடுக்கும்

    முல்லை மோகன் அவர்களுக்கும் வணக்கம்

    இன்பத் தமிழின் கவியின்பம் பருக இணைந்திருக்கும்

    அனைவருக்கும் வணக்கம்


                           இன்பத் தமிழும் நாமும் 


    அன்னைத் தமிழே நீ விழியானாய் எம் மொழியானாய்

    விழியின் றிவ்வுலகில் ஒளியில்லை

    நீயின் றிவ்வுலகில் எமக்கு அறிவில்லை

    கருவறையில் களித்திருக்க தாலாட்டாய் உள்நுழைந்தாய்

    கன்னித் தமிழாய் காலமெல்லாம் கூட வந்தாய்

    தொட்டிலிலே கண்ணுறங்க தோளினிலே சாய்ந்துறங்க

    கட்டிலிலே நானுறங்க காலமெல்லாம் கூட வந்தாய் 

    கட்டிக் கரும்பே கட்டழகுப் பெட்டகமே

    கண்ணான கண்மணியே கனியமுது சக்கரையே

    கொவ்வைப் பழமே என் கொஞ்சும் மொழியேயென

    கொஞ்சிக் கொஞ்சி எம்தாய் கொஞ்சிய மொழிகளெல்லாம்  

    எம் நெஞ்சினிலே தேனாய் இனித்ததடி 

    பாகாய் சொரிந்ததடி பக்குவமாய் நாம் வளர்ந்தோம்


    துள்ளிவிளையாடித் தோழியரோடாட்டம் போட்டு

    வள்ளிக் கிழங்கெடுத்து வரிவரியாய் கவி தொடுத்தோம்

    அரிமிளகு திரிமிளகு அன்னம் பிலாக்காய்

    அழகழகாய் சமைத்தெடுத்து அதிலுமொரு பாட்டிசைத்தோம்

    சங்கத்தமிழினிலே சஞ்சாரம் செய்து 

    பல்கலைக்கழகமதில் பாட்டோடு கூடவந்தாய்

    நற்றிணை நல்ல குறுந்தொகையென 

    எட்டுத்தொகையாக எமக்குள் நுழைந்தாய்

    முருகு பொருநாறு பாணிரண்டு முல்லையென

    பத்துப் பாட்டாக மனதுள் பதியம் போட்டாய்

    சிற்றிலக்கியம் பேரிலக்கியம் சிறப்புமிகு புதுக்கவிதை

    வற்றாத நதியாக வழமாக சொரிந்த சொற்கள்

    மனமெங்கும் தமிழாய் பூத்துக் குலங்கி பூரிப்புக் கண்டோம் 


    மனமெங்கும் பொழிந்த மாசறு தமிழே யுனை

    தெம்மாங்குத் தமிழாலே மாணவர் மனமெங்கும்

    தென்றலாய் தவழ்ந்து வர தேனாகப் பொழிய வைத்தோம்

    வாழ்வாங்கு வாழும் உன் உயர்ச்சி கண்டு களிப்படைந்தோம்

     

    பக்குவமாய் நாமிருக்க சுத்திவரும் புவியைப்போல் 

    சுத்திச் சுத்தி வந்தவர்கள் சுளை சுளையாய் 

    பாட்டிசைக்க மனசெங்கும் பவனி வந்தாய்

    வைரமுத்து கண்ணதாசன் வாலி எனும் கவிஞர்கள்

    வரிகளெலாம் வரிசைகட்டி மனதுள் மத்தளம் போட்டன

    சக்கர நாற்காலியாய் மனதுள் சங்கீதம் சுழன்றுவர 

    சாகரமாய் தமிழின்பம் இங்கிதமாய் உள்நுழைய 

    கன்னிப் பருவத்திலே எமைக் களிப்படையச் செய்தவளே


    மான் போலத் துள்ளி மயில் போல நடனமாடி

    தேன் போல சுவைத்து செங்கதிர் போல ஒளிவீசி

    வான் போல நிறைந்து வளர் மதி போல குளிர்ந்து

    குயில் போல இசைத்து என் நாடி நரம்பெல்லாம்

    மின்னோட்டமாய் நிறைந்திருக்கும் தமிழே 


    இன்று 


    கணனித் தமிழாய் காலெடுத்து வைத்தாய் 

    தொட்டு எம் கைதட்ட கம்பீரக் காட்சி தந்தாய் - இன்று

    கொரானா உலகெங்கும் கொக்கரிக்க 

    கோலோச்சும் சித்தர்தம் மூலிகைகள்

    சித்தர் தமிழாய் சிறந்து நிற்கும் முத்திரைகள்

    சித்தமெங்கும் நிறைந்திருக்கும் சிறப்பனைத்தும் 

    பண்டைத் தமிழைக் காணவைத்து வாழ்க்கைப் 

    பக்கம் பக்கமாய் எம்மோடு கூடவரும் தமிழே

    செம்புலப் பெயல் நீர்போல் அம்புவி யெங்கும் 

    அரியணையேறி அரசாட்சி செய்து அகிலம் போற்ற 

    வாழி நீ தமிழே வாழி நீ 







     


    ஞாயிறு, 8 மே, 2022

    அன்னையர் தின வாழ்த்08.05.20222022







    அளவுகடந்து நாம் உச்சரித்த ஒரே சொல் அம்மா
    உரக்கச் சொல்லியிருக்கிறாம்
    அழுது சொல்லியிருக்கின்றோம்.
    ஆவேசமாகச் சொல்லியிருக்கின்றோம்.
    குழைந்து சொல்லியிருக்கின்றோம்
    கெஞ்சிச் சொல்லியிருக்கின்றோம்.
    அதட்டிச் சொல்லியிருக்கின்றோம்
    எத்தனை உணர்ச்சிகள் இருக்கின்றனவோ
    அத்தனை உணர்ச்சிகளிலும் பயன்படுத்திய
    ஒரே சொல் அம்மா
    அடம்பிடித்திருக்கின்றோம்
    ஆட்டிப் படைத்திருக்கின்றோம்.
    சரியென்று நிரூபித்துப் பார்த்திருக்கின்றோம்.
    முட்டாளாக்கியிருக்கின்றோம் - எத்தனைமுறை
    நாம் முட்டாளாக்கினாலும்
    விரோதியாக்கினாலும்
    எதிரியாக்கினாலும்
    அன்பை மட்டுமே பொழியும் அதிசய உறவு அம்மா
    அம்மா என்று சொல்லிப் பாருங்கள்
    எத்தனை முறை சொன்னாலும்
    அத்தனை முறையிலும்
    அந்தச் சொல்லிலேயே தேன் கலந்திருக்கும்
    கட்டியணைப்பிலே சுகம் இருக்கும் - எமை
    தொட்டுப் பேசுகையில் சுகம் இருக்கும்
    தாய் மடிதந்த சுகம் தரணியில் எங்கும் இல்லை
    அவள் கண்டிப்பான வார்த்தையிலே
    எதிர்கால வளர்ச்சிக்கான மந்திரம் இருக்கும்
    கண்ணைக் காட்டி எம்மைக் கட்டிப் போட வைக்க
    அவளால் மட்டுமே முடியும்
    சோறு ஆக்கிப் போடுவது அவளானாலும்
    சுவை பார்ப்பது நாமாகத் தான் இருக்கும்
    அந்தக் கைப்பக்குவத்திற்கு நிகராக
    எந்த சமையல் நிபுணரும் உலகத்தில் இல்லை
    அம்மாக்கு நிகராக யாரும் பிறக்கவும் முடியாது
    இருக்கவும் முடியாது


     

    வியாழன், 28 ஏப்ரல், 2022

    தியானத்தால் பிட்யூட்டரி சுரப்பியை சீராக இயங்கச் செய்யலாம்

                    

           பிட்யூட்டரி - ஹைபோபைஸிஸ் (Pituitary Gland – Hypophysis)





    ஆக்னை தியானம் செய்வதனால் பிட்யூட்டரி கிளான்ட் ஐ சரியான முறையில் இயங்கச் செய்யலாம். இதன் தொழிற்பாடு என்ன? இது என்ன தொழிற்பாட்டை உடலில் செய்கின்றது என்பதனை அறிய முழுவதுமாக இந்தக் கட்டுரையைப் படியுங்கள் 

    மூளையிலிருந்து கட்டளைகள் பிறப்பிக்கப்பட அந்தக் கட்டளைகளை ஏற்று உடலிலுள்ள அத்தனை உறுப்புக்களும் தொழிற்பட சுரப்பிகள் உதவுகின்றன. 

    சுரப்பிகள் 2 வகைப்படும் நாளமுள்ள (நரம்பு) சுரப்பிகள், நாளமில்லா சுரப்பிகள். நாளமுள்ள சுரப்புகள் என்சைம் என்னும் நொதியத்தைச் சுரக்கின்றன. நாளமில்லா சுரப்புகள் ஹார்மோன்களைச் சுரக்கின்றன. 


    நாளங்கள் என்பது என்சைம்களை வெளியேற்ற நுண்ணிய துளைகளைக் கொண்ட குழாய் போன்ற அமைப்பையுடைய நரம்புகளாகும். குறிப்பிட்ட நாளங்கள் வாயிலாக என்சைம் குறிப்பிட்ட உறுப்புக்களுக்கு கடத்தப்படும். உதாரணமாக உமிழ்நீர் சுரப்பு, வியர்வை, பால் சுரப்புகள்


    நாளமில்லாச் சுரப்புகள்(Endocrine glands) நாளங்களின் மூலமாக ஹார்மோன்களைக் கடத்தாமல் நேரடியாக இரத்தத்தில் ஹார்மோன்களை கலக்கச் செய்வது. எடுத்துக்காட்டாக பிட்யூட்டரி, தைரோய்ட், தைம்ஸ் 


    தைரோய்ட், தைம்ஸ் 

    தைம்ஸ் 

    கணையம்  என்பது இரட்டைப் பண்புச் சுரப்பியாகும்

    இது நாளமுள்ள, நாளமில்லா என்று இரண்டு பண்புகளிலும் செயற்படுகின்றது. நாளமுள்ள சுரப்பியாக கணையம் செயற்படும். நாளமில்லா சுரப்பியாக கணையத்திலுள்ள லாங்கர் ஹான் திட்டுகள்(பாங்கிரியாஸ்) . பாங்கிரியாஸ் என்ற கணையத்திலிருந்து சுரக்கும் இன்சுலின் சர்க்கரையைக் கட்டுப்படுத்த உதவுகிறது. இந்த இன்சுலின் எதிர்ப்பு நிலையில் உடலில் உள்ள திசுக்கள் இன்சுலினைப் பயன்படுத்துவது இல்லை. இதனால் ரத்தத்தில் சர்க்கரை அதிகரித்து இன்சுலினும் அதிகரிக்கிறது. கொழுப்பும் சேர்கிறது. மேலும் வயது, மரபணு, மன அழுத்தம், உடற்பயிற்சியின்மை போன்றவை இதற்குக் காரணமாகின்றன. 

    உடலிலுள்ள அனைத்து உறுப்புக்களின் ஆரோக்கியத்திற்குத் தனிப்பட்ட முறையில் பொறுப்பேற்று செயற்படுபவை இந்த நாளமில்லாச் சுரப்பிகளே. உடலிலுள்ள அன்றாட வளர்ச்சி, வளர்சிதை மாற்றம், ஆபத்தின் போது தப்பி ஓடுவது, பாலியல் தூண்டல், இனப்பெருக்கம், போன்ற செயற்பாடுகளுக்கு நாளமில்லாச் சுரப்பிகள் உற்பத்தி செய்யும் ஹார்மோன்களே தீர்மானிக்கின்றன. 

    பிட்யூட்ரி கிளான்ட்- Mastergland 







    மூளையின் அடிப்பகுதியில் அமைந்துள்ள நாளமில்லாச் சுரப்பி. ஹைப்போசிஸ் என்று அறிவியலாளர் கூறுவர். இதைக் கபச்சுரப்பி என்று தமிழில் அழைப்பர். இது ஒரு பட்டாணி அளவிலும், 0.5 கி (0.02 அவுன்ஸ்) எடையைக் கொண்டதாகவும் இருக்கிறது. மூளையின் அடியில் பரிவக கீழ் பகுதியின் கீழாக ஒரு நீட்சியாக இது உள்ளது, அதில் ஒரு சிறிய எலும்பு குழியில் (செல்லா டர்சிகா) அமைந்துள்ளது, இதனை ஒரு ட்யூரல் மடிப்பு மூடியிருக்கிறது. பிட்யூட்டரி சுரப்பி அமைந்துள்ள பிட்யூட்டரி (கபச் சுரப்பி) ஃபோஸ்ஸா என்ற பகுதியானது, மூளையின் தரைப்பகுதியில் உள்ள மத்திய கிரானியல் ஃபோஸ்ஸாவின் ஸ்பெனாய்டு எலும்பில் அமைந்துள்ளது. பிட்யூட்டரி சுரப்பியானது, உடல்சமநிலையை (ஹோமியோஸ்டாஸிஸ்) ஒழுங்குப்படுத்தும் ஹார்மோன்களைச் சுரக்கிறது. இதில் பிற நாளமில்லா சுரப்பிகளைத் தூண்டும் ஹார்மோன்களும் அடங்கும். உடலிலுள்ள அனைத்து நாளமில்லாச் சுரப்பிகளையும் கட்டுப்படுத்தும். 

    அனைத்து நாளமில்லாச் சுரப்பிகளையும் கட்டுப்படுத்துவது பிட்யூட்டரி சுரப்பி என்றாலும் இந்த பிட்யூட்டரி சுரப்பியைக் கட்டுப்படுத்து ஹைப்போதலாமஸ்  என்னும் உறுப்பு. 

    போஸ்டீரியர் பிட்யூட்டரி சுரப்பியில் இருந்து வெளிவரும் வாசோபிரஸின் ஹார்மோன் போதிய அளவு சுரக்காத பட்சத்தில், சிறுநீர் அளவுக்கு அதிகமாக நமது உடலில் இருந்து வெளியேறும். இந்த பாதிப்பைச் சரிசெய்ய, வாசோபிரஸின் ஹார்மோனை ஊசி மூலமாகவோ அல்லது மாத்திரை வடிவிலோ மருத்துவர் ஆலோசனையின்படி எடுத்துக் கொள்ளலாம்.

    உடலின் சமநிலையை ஒழுங்குபடுத்தும் ஹோமியோஸ்டாஸிஸ் ஹார்மோனைச் சுரக்கிறது. அத்துடன் பிற நாளமில்லாச் சுரப்பிகளையும் தூண்டக்கூடிய டிரோபிக் வகை ஹார்மோன்களையும் உற்பத்தி செய்கிறது. இது இரண்டு பிளவுபட்ட மடல்களைக் கொண்டது. முன்புற மடல் அடினோஹைப்போபைஸிஸ் பின்புற மடல் நியூரோஹைப்போபைஸிஸ். 


    முன்புறம் சுரப்பி திசுக்களையும் பின்புறம் நரம்பு திசுக்களையும் கொண்டுள்ளது. எனவே இரண்டாவது மடல் நேரடியாக எந்தவித சுரப்புக்களையுமு; சுரப்பதில்லை. அதற்குப்பதிலாக ஹைபோதலாமஸில் சுரக்கின்ற வாசோபிரஸின் மற்றும் ஆக்ஸிடோசின் ஆகிய இரண்டு ஹார்மோன்களையும் சேகரித்து வைத்து இதன் வாயிலாக வெளியேற்றுகிறது. 


    அடினோஹைப்போபைஸிஸ் இல் 5 விதமான ஹார்மோன்கள் சுரக்கின்றன. 


    1.    GH - Growth Hormone

    2.  TSH – Prolactin     தைரோய்ட்டைத் தூண்டும் ஹார்மோன்


    தைரொக்ஸின், டிரையோடோதைரோனின் (Triiodothyronine) என்னும் இரண்டு ஹார்மோன்களைச் சுரக்கின்றது. அதிகமாகச் சுரந்தால் ஹைபோதைரோய்டிசம் என்பர். அதிக தாகம், அதிக பசி, நடுக்கம், எரிச்சல், எடை குறைவு, கண்பார்வை குறைபாடு, மாதவிடாய் குறைபாடு, இருதய பாதிப்பு ஏற்படலாம்

    3. ACTH - அட்ரினோ கார்டிகோட்ராபிக் ஹார்மோன் 

    அட்ரீனல்  சுரப்பியைத் தூண்டும். அதிகரித்தால், (Cushing Disease) வரும். திடீர் உடல் எடை கூடுதல், ரத்த அழுத்தம், இரத்தத்தில சர்க்கரை அளவு அதிகரித்தல், எலும்புகள் உறுதியின்மை ஏற்படும் 

    4. PRL  -  லாக்டோஜானிக் ஹார்மோன்

    மார்பக வளர்ச்சியை ஊக்குவிப்பது, பால் சுரப்பிகளின் வளர்ச்சியை ஊக்குவிப்பது, 


    5. GTH –  இரண்டு உட்பிரிவுகள்


    1.  FSH போலிக்கிள்களைத் தூண்டும் ஹார்மோன். விந்தணுக்கள் உருவாவதை ஊக்குவிக்கும். பெண்களின் அண்ட செல்கள் வளர்வதற்கு உதவும்.

    2. LH - இது லுட்டினைசிங் ஹார்மோன். ஆண் பெண் இனப்பெருக்க உறுப்புக்களின் வளர்ச்சியை மேம்படுத்தும்.

      


    ஆண்களின் டெஸ்டோஸ்டிரோன் ஐயம் பெண்களின் ஈஸ்ட்ரோஜன், புரஜெஸ்ட்ரோன் உற்பத்திக்குக் காரணமாகின்றது. அதிகமாகச் சுரந்தால் ஈஸ்டரோஜன், டெஸ்டோஸ்டிரோன் அளவு குறையும். 

                                           நியூரோஹைப்போபைஸிஸ். 


                         

             

    இரண்டு ஹார்மோன்களைச் சுரக்கின்றது.


    1. ADH - ஆண்டிடையூரிட்டிக் என்னும் வாஸோபிரஸின் 

    சிறுநீரக நாளங்களில் அதிகப்படியாக வெளியேற்றப்படும் நீரைக் கட்டுப்படுத்தி அந்த நீரை மீண்டும் உடலால் உறிஞ்சப்படுவதை ஊக்குவிக்கும். இந்த ஹார்மோன் குறைவாகச் சுரந்தால் அதிகளவு நீர் கழியும். இதை பலியூரியா என்பர் சர்க்கரையில்லா நீரழிவு. , இரத்த அழுத்தத்தைச் சமப்படுத்தும் வேiயையும் செய்கிறது. 

    2. ஆக்ஸிடோஸின் 

    பெண்களுக்கு குழந்தை பிறப்பின்போது கருப்பை சுரங்கி விரியும் தன்மையை ஊக்கப்படுத்தும். பால் சுரப்பிகளில் பாலைத் தேவையான அளவில் கட்டுப்படுத்தி வெளியேற்றும் வேலையைச் செய்கிறது.





    வியாழன், 14 ஏப்ரல், 2022

    சித்திரைப் புத்தாண்டு நல்வாழ்த்துகள்

     


    இயற்கை மனிதனை சோதிக்கிறதுது
    அரசு மனிதனை சோதிக்கிற
    மனித மனங்கள் சஞ்சலப்பட்டு கிடக்கிறன
    சுழல்கின்ற பூமியிலே அனைத்தும் சுற்றிச் சுற்றியே வருகின்றன.
    காலம் ஒருநாள் கைகூடும்
    மனதின் மகிழ்ச்சி நிலைத்திருக்கட்டும்
    நல்லதையே நினைத்து
    நலம் பெறும் என்ற நம்பிக்கையோடு
    இந்தப் புதுவருடத்தை கொண்டாடி மகிழ்வோம்.
    மகிழ்ச்சி வெளியில் இருந்து வருவதில்லை
    நமக்குள்ளேதான் இருக்கின்றது.



    சனி, 26 மார்ச், 2022

    என்னைக் கவர்ந்த வேதாத்திரி மகரிஷியும் ஆன்மீக அனுபவமும்



    அங்கிங்கெணாதபடி எங்கும் பிரகாசமாய் ஆனந்த பூர்த்தியாகி 

    அருளொடு நிறைந்ததெது தன் அருள் வெளிக்குளே 

    அகிலாண்ட கோடியெல்லாந் தங்குப் படிக்கிச்சை வைத்துயிர்க் குயிராய்

    தழைத்ததெது மனவாக்கினில்

    தட்டாமல் நின்றதெது சமய கோடிகளெல்லாந்

    தந்தெய்வம் எந்தெய்வமென் 


    என்னும் தாயுமானவர் வரிகளையும் 

    தன்னை அறியத் தனக்கொரு கேடில்லை

    தன்னை அறியாமல் தானே கெடுகின்றான்

    தன்னை அறியும் அறிவை அறிந்த பின்

    தன்னையே நேசிக்கத் தானிருந்தானே

    என்ற திருமூலர் பாடலையும் உங்கள் முன் வைத்து இன்று இன்றைய வேதாத்திரி மகரிஷி அவர்களுடைய பிறந்தநாளிலே என்னுடைய அனுபவங்களை சிறிது பகிர்ந்து கொள்ளலாம் என்று இருக்கின்றேன். 

    முடிவில்லாத இந்த உலகத்தில், பூமியின் ஒவ்வொரு பகுதியில் அதாவது வெவ்வேறு நாடுகளில் இருந்தபடி நாம் அனைவரும் சுழன்று கொண்டிருக்கின்றோம். நாம் அனைவரும் வெவ்வேறு நாடுகளில் சுழன்று கொண்டே வாழ்ந்து கொண்டிருந்தாலும் இந்தத்தருணம் எல்லோரும் ஒரு மையத்தில் ஒரே நோக்கத்துடன் ஒரே சிந்தனையுடன் ஒருவரின் ஆசியுடன் இந்த ஆன்மீகப் பயணத்தை மேற்கொண்டு இருக்கின்றோம். அதுதான் எம்முடைய மகான் வேதாத்திரி மகரிஷி அவர்களின் வழிகாட்டல். 

    காலம் போடுகின்ற கணக்கை கட்டிப் போடவோ தீர்மானிக்கவோ எங்களால் முடியாது. எங்களை மீறி நடக்கின்ற சக்தியை அடக்கி வைக்கின்ற பக்குவமும் எமக்குக் கிடையாது. அது போகின்ற பாதையிலே நாம் நாமெல்லோரும் பயணம் செய்கின்றோம். ஒவ்வொரு மனிதர்களுக்குள்ளும் ஒவ்வொரு வரலாறு இருக்கின்றது. அந்த வரலாற்றுப் பாதையிலே இன்றைய நாள் இங்கு கூடியிருக்கின்றோம் என்றால் அது காலம் போட்ட கட்டளை. அதுவும் மகரிஷி அவர்களுடைய 111 ஆவது பிறந்த நாளிலே எம் ஒவ்வொருவருக்கும் அனுபவங்களைப் பகிர்ந்து கொள்ளச் சந்தர்ப்பம் கிடைத்திக்கின்றது. இது எப்படி நடந்தது என்பதற்கு என்னால் சொல்ல முடியாது. ஆனால் நடந்திருக்கின்றது. என்னை ஆட்டிப் படைக்கும் சக்தி உங்கள் எல்லோரையும் ஒன்றாக இணைத்திருக்கின்றது. இதற்கு நாம் யாரும் காரண கர்த்தாக்கள் இல்லை என்பதே உண்மை. எம்மையெல்லாம் வழிநடத்துவதற்கு இந்தப் பிரபஞ்சம் இருக்கின்றது. அங்கே வான் துகளாக மகரிஷி எம்மை எல்லாம் வழி நடத்திக் கொண்டிருக்கின்றார். 

    வேதாத்திரி மகரிஷி அவர்களை எனக்கு விளக்கிக் காட்டியவர் டாக்டர் கோபால்ஜி அவர்கள். அவரே குருவாக இருந்து மகரிஷி என்னவெல்லாம் கூறினாரோ அவருக்குக் கற்பித்தாரோ என்ன அனுபவங்களைத் தந்தாரோ அவற்றையெல்லாம் மனதில் பதித்து எங்களுக்கு அள்ளி வழங்கிக் கொண்டிருக்கின்றார். 

    நிச்சயமாக ஆன்மீகம் என்பது ஒரு அனுபவம். இது பிறர் சொல்லி எமக்கு ஏற்படுவதில்லை. ஆனால், எமக்குள்ளாகவே ஒரு உணர்வு தோன்ற வேண்டும். அதற்கு எமக்கு உள் உணர்வு ஏற்பட வேண்டும். ஆர்வமும் விருப்பமும் இருக்க வேண்டும். அந்த உணர்வைத் எமக்குத் தூண்டுபவராக குரு கோபால்ஜி அவர்கள் இருக்கின்றார். குரு கோபால்ஜி அவர்களிடம் 

    நாடிசுத்தி, தண்டுவட சுத்தி, பிரணாயாமம், ஆதார சக்கரங்களை தூண்டுதல். தெய்வீக மையம் மூன்றாவது கண் திறத்தல், தீட்சை அது பற்றிய விளக்கம், ஆக்கினை தவம், துரிய தவம் சாந்தி தவம், துரியாதீத தவம், பிரபஞ்ச நவக்கிரக தவம், பஞ்சேந்திரிய தவம்,  சித்தர்களின் நீள் ஆயுள் பயிற்சி, காயகல்ப யோகம், சாந்தி தவம், கண்ணாடிபயிற்சி, தீபப்பயிற்சி, உடற்பயிற்சி, அறுகுண சீரமைப்பு, உடல் வருடுதல், அக்குபிரஷர் பயிற்சி, டீழனல யனெ ஆiனெ சுநடயஒயவழைn போன்ற பயிற்சிகளை கற்றோம். உடல்நலமும் உளநலமும் தூயசிந்தனையும் கொண்ட வாழ்க்கையை எமக்கு  குரு கற்பித்தார். குறுகிய காலப்பகுதியிலே இவ்வளவு விடயங்களும் நாம் கற்பது என்பது இக்காலப்பகுதியில் இலகுவான காரியம் இல்லை. இந்த அருள் எமக்குக் கிடைப்பது என்பது ஒரு பாரிய கொடுப்பினை என்றுதான் நான் கருதுகின்றேன். தாரமும் குருவும் தலைவிதிப்படி என்பார்கள். எமக்கு இவ்வாறான குரு கிடைத்தமைக்கு இந்த நேரத்தில் குருஜி அவர்களுக்கு மிக்க நன்றியைத் தெரிவித்துக் கொள்ளுகின்றேன். 

    வேதாத்திரி மகரிஜி அவர்களின் தியான முறைகள் என்னை மிகவும் கவர்ந்ததற்குக் காரணம். அவர் அறிவியலுடன் ஆன்மீகத்தை விளக்கியதுதான். உடல், மனம், ஆன்மா பற்றிய தேடலை விஞ்ஞான விளக்கத்துடன் கற்பித்திருக்கின்றார். பிரபஞ்சம் பற்றிய பார்வையை தியானமுறைக்குள் கொண்டு வந்திருக்கின்றார். உடற்பயிற்சி, அக்குபிரஷர், அறுகுணசீரமைப்பு  போன்றவை மூலம் உடலையும் மனதையும் சீரமைப்பதற்குரிய பயிற்சிகளைக் கொடுத்திருக்கின்றார். 

    தவம் செய்வதற்கு நாம் இமயமலை தேடிப் போகத் தேவையில்லை. சந்நியாசியாக இருக்க வேண்டிய அவசியமும் இல்லை. பிரமச்சரியம் கிரகஸ்தம், வானப்பிரஸ்தம், சந்நியாசம் என்ற வாழ்வின் ஒவ்வொரு கட்டங்களையும் கடந்து வாழ்ந்து தான் மனிதன் இறக்க வேண்டும். ஒவ்வொரு காலப்பகுதியிலும் தவம் செய்வதற்குரிய முறைகள் இருக்கின்றன. அதற்கு எமது உடலிலுள்ள 7 சக்கரங்களும் மனிதனின் 70 ஆயிரம் நாடிகளின் உயிராய் ஒவ்வொரு உணர்வுகளைத் தூண்டக்கூடியனவாக இருக்கின்றன. அவற்றை சரியான அளவிலே நாம் பயன்படுத்துகின்ற போதுதான் நாம் இந்த உலகிலே சீரான வாழ்க்கையை வாழ முடியும். அதற்கு உடல், உள, தியானப் பயிற்சிகளை மகரிஷி வடிவமைத்துக் கொடுத்திருக்கின்றார். 

    உதாரணமாக மூலாதாரம் சரியான முறையில் செயற்பட்டாலேயே பசி தூக்கம் ஒழுங்காக வேலை செய்யும். அட்ரீனல் சுரப்பிகள் இதனுடைய நேரடிக் கட்டுப்பாட்டில் இயங்குகின்றன. பாலியல் சக்தியை ஒழுங்குபடுத்த சுவாதிஸ்டானம் உள்ளது. மணிப்பூரகம் இதிலிருந்து உடலியக்கச் சக்தி உடலெங்கும் பரப்பப்படுகிறது. அன்பு பாசம் இரக்கத்தின் இருப்பிடம் அநாகதம் இருக்கின்றது. விசுப்தி குரல்வளைச் சக்கரம் என்று சொல்லப்படுவது. இதுவே எண்ணங்களை வெளிப்படுத்தவும் படைப்பாற்றலை வெளிப்படுத்தவும் காரணியாக இருக்கிறது. ஆகாயதத்துவத்தைக் குறிக்கிறது. ஆக்கினை சக்கரம் ஞானம், பேரறிவு, தொலைதூர சிந்தனை இவற்றை வழங்குகிறது. பிட்ரூய்ட் சுரப்பி இதன் கட்டுப்பாட்டிலுள்ளது. சகஸ்ரகாரம் என்றும் துரியம் என்றும் சொல்லப்படும் சக்கரம் பிரபஞ்சத்திற்கும் எமக்கும் உள்ள தொடர்பை விளக்குகின்ற சக்கரம். இவ்வாறு ஒவ்வொரு சக்கரங்களிலும் மனதைப் பதித்து தியானம் செய்கின்ற போது அவற்றின் ஆற்றலை மேம்படுத்துகின்றோம். அப்படியென்றால் அவற்றின் ஆற்றல் எமக்குத் தேவை அல்லவா? அந்த ஆற்றலை மேம்படுத்தாமலும் குறைக்காமலும் ஒரு சீராக வைத்துக் கொள்வதற்காக தியானமுறைகளிலே நாளொன்றுக்கு ஒரு தியானம் என்ற வகையிலே  வகைப்படுத்தி மகரிஷி எமக்குக் கொடுத்திருக்கின்றார். பாலியல் சக்தி எமக்குத் தேவையில்லை என்று சுவாதீஸ்டானத்தின் பயிற்சியைக் மகரிஷி வழங்காமல் விட்டிருக்கலாம். ஆனால், உயிர் உருவாக்கம், மனித வளம் உலகத்திற்குத் தேவை என்பதை உணர்ந்தவரே மகரிஷி அவர்கள். அதனால், அனைத்து சக்கரங்களுக்கும் சக்கரா தியானத்தைக் கொடுத்திருக்கின்றார். 

    எம்முடைய வாழ்க்கைப் பயணத்திலே நாம் பலரைச் சந்திக்கின்றோம். பலரோடு பழகியிருக்கின்றோம். அதன் மூலம் நல்ல நினைவுகளும் கவலையான நினைவுகளும் எமக்குள்ளே கலந்திருக்கின்றன. கலந்த அந்த நினைவுகளைக் கழுவித் துடைக்க முற்படுகின்றோம். ஆனால், அது எம்மால் முடிவதில்லை. சில நினைவுகள் எம்முடன் இரண்டறக் கலந்து எம்மை ஆட்டிப் படைக்கும். இந்த சமயத்திலே எம்மை நாம் கட்டுப்படுத்தி வாழ வேண்டியது அவசியமாகின்றது. இதற்குத் தியானம் அவசியம் என்னும் அனுபவம் எனக்கு ஏற்பட்டிருக்கின்றது.

    எங்களுடைய உடலும் எங்களுடைய உடலின் தொழிற்பாடும் இந்த பிரபஞ்சமும் பேராச்சரியம் என்று எனது தேடல் விரிவடைகின்றது. நாட்களின் வளர்ச்சியில் தேடல்களின் பயனாகத்தான் எம்முடைய ஆயுள்காலம் விரிவடைகின்றது. இதுவரை காலமும் எமக்குள்ளே இருந்த எண்ண ஓட்டங்கள் தற்போது வேறு திசைக்கு மாற்றப்பட்டிருக்கின்றன. மனிதன் வாழ்க்கை முழுவதும் ஒரு கற்றல் தொழிற்பாட்டிலேயே அவனை அறியாமல் ஈடுபட்டிருப்பான். பொதுவாகவே எமக்குள் நுழைகின்ற ஒவ்வொரு வார்த்தைகளுக்கும் விளக்கம் தேடிக் கொண்டிருக்கின்ற நாம் அதற்குரிய தெளிவான விடையைக் கண்டு பிடிக்கும் போதுதான் உண்மையிலே மனம் முழுவதும் மகிழ்ச்சியடைகின்றோம். அந்த தேடலின் வெற்றி கிடைத்த பின்புதான் அதில் முழுவதுமாக ஈடுபடவும் முனைகின்றோம். 

    பொதுவாகவே அறிவியல் பற்றியும் ஆத்மா பற்றியும் பலவித ஆராய்ச்சிகளில் நான் ஈடுபடுகின்றேன். இவ்வாறு பூரணமான சிந்தனையின் வெளிப்பாடுதான் சிறந்த அறிவும் சிறந்த ஞானமுமாக அமைகின்றது. 

    எண்ணம் என்பது எம்மை கட்டிப்போட வைக்கின்றது ஒவ்வொரு சிந்தனைக்குள்ளும் நாம் பரந்துபட்ட வினாக்களை எழுப்புகின்றன போதுதான் ஒரு விடையை நாம் காணுகின்றோம் யார் சொன்னார் இவர் சொன்னார் என்பதை விட்டுவிட்டு எவர் சொன்ன சொல்லையும் உனது சொந்த அறிவால் எண்ணிப்பார் என்று சொன்னார் சாக்ரடீஸ். எப்பொருள் யார்யார்வாய்க் கேட்பினும் அப்பொருள் மெய்ப்பொருள் காண்பது அறிவு என்று சொன்னார் திருவள்ளுவர். இந்த இருவருடைய  எண்ணங்களையும் நாம் எடுத்து பார்க்கின்றபோது எமக்குள்ளே தெளிவு ஏற்பட வேண்டும் என்பதற்காகத்தான் இவ்வாறான வார்த்தைகள் திருவள்ளுவர் போன்றவர்களால் கூறப்பட்டது. எண்ணம் என்பது எம்மை தூய்மைப் படுத்துவதாக இருந்தால் அந்த எண்ணத்தை நாம் விரிவுபடுத்த வேண்டியது அவசியம் ஜீவ சக்தியை நாம் அதிகரிக்க வேண்டுமென்றால் எம்முடைய எண்ணம் தூய்மையாக இருக்க வேண்டும் அந்தத் தூய்மையான எண்ணத்தை ஏற்படுத்துவதற்கு எமக்குள்ளே வினாக்கள் வர வேண்டியது அவசியம் அந்த வினாக்களுக்குத் தெளிவு ஏற்படுத்தி சந்தேகங்களை தீர்த்து பரிசுத்தமான எண்ணம் உள்ளவர்களாக நாம் மாற வேண்டும் என்ற அனுபவம் எனக்கு கிடைத்திருக்கின்றது.

    எல்லாம் வாழ்க்கையிலே ஒரு பாவனையில் தான் ஆரம்பிக்கின்றது. ஒரு புனைகதை ஒரு சிறு கதையோ ஒரு சக்தியோ எல்லாம் கற்பனையிலேதான் காணுகின்றோம். ஒரு பாவனை என்று சொல்வதை தெளிவாக உணர வேண்டும் என்றால் அது ஒரு கற்பனையில் தான் நாம் முதலில் கடவுளை காணுவோம். இறைசக்தி உள்ளே பெறுகின்றது என்று கற்பனை பண்ணுகிறோம் அது எங்கள் உடல் முழுவதும் பரவுவதாக எண்ணுவோம் காலப்போக்கில் எமது மூளை அதை உள்வாங்கி மூலாதாரத்தில் பதிவு செய்துவிடும். பயிற்சி செய்கின்ற போது அந்த மூலாதாரத்தில் இருந்து எழுகின்ற எண்ணங்கள் எம்மை ஆட்டிப்படைக்கும். 

    கற்பனையில் உள்நுழைந்த கடவுள் தன் உண்மையான ரூபத்தை எமக்கு காட்டுவார் என்பதுதான் என்னுடைய தெளிவான அனுபவமாக நான் காணுகின்றேன். எங்களுடைய அத்தனை சக்தியும் இரண்டு கைகளையும் கூப்பி வைக்கின்ற போது வலம் இடம் என்றும் இடது வலம் என்றும் மாற்றப்படுகின்றது. அப்போது இருக்கின்ற அந்த அலைகள் உடல் முழுவதும் செலுத்தப்படுகின்றது நான் ஒரு சக்தி மயமான ஒரு உடலைத் தாங்கிய மனிதனாக காணப்படுவோம் அப்போது எங்களுடைய கைகளை பிறரிடம் கொடுக்கின்ற போது அந்தக் கைகளில் இருக்கின்ற எண்ண அலைகள் பிறருக்கு பாய்ச்சப்படுகின்றது. இவ்வாறுதான் குருஜி வேதாத்திரி மகரிஷியிடம் இருந்து பெற்ற ஆற்றலை குருஜி தன்னுடைய கைகள் மூலமாக எமக்கு பரப்புகின்றார் என்பதை நான் அனுபவம் மூலம் உணருகின்றேன். 

    எமக்குத் தெரியாமல் எம்முடைய உடலுக்குள்ளே ஒரு இயந்திரத்தை தாங்கிக் கொண்டு இருக்கின்றோம். அவை எமக்கு உள்ளே இருப்பதை எம்முடைய கண்களால் பார்க்க முடியாது. ஆனால் இருக்கின்றது இதை நாம் அறிந்திருக்கின்றோம். அப்படியென்றால் சிறுவயதிலிருந்து நாம் கற்ற கல்வியின் மூலமாக எந்த இடத்தில் எது இருக்கின்றது என்பதை கற்று அறிந்து இருக்கின்றோம். பிறர் கூறக் கேட்டு  இருக்கின்றோம். நமக்குள்ளே  உணர்ந்திருக்கிறோம்.  ஆனால் அந்த உடலுக்குள்ளே இருக்கின்ற உறுப்புகளை சுத்தம் செய்ய வேண்டும் என்று நாம் நினைத்துப் பார்ப்பதில்லை.  ஏனென்றால் அதை நாம் காண்பதில்லை. எந்த ஒரு இயந்திரமாக இருந்தாலும் பொருளாக இருந்தாலும் ஒவ்வொரு நாளும் அதைச் சுத்தம் செய்ய வேண்டியது அவசியம்.  இல்லாவிட்டால் அந்தப் பொருள்  பழுதாகிப் போய்விடும். நோய் ஏற்படுகின்றபோது உடனடியாக கிடைக்கின்ற மருந்துகளை பாவித்துவிட்டு அது சுகமாகி விட்டது என்று  இருந்து விடுகின்றோம்.  அது பற்றி எந்தவித சிந்தனையும் இல்லாமல் மனம் போன போக்கிலே போகின்றோம். இதேவேளை உள்ளே மனம் என்ற ஒன்று இருக்கின்றது என்பதை அறிந்திருக்கின்றோம். ஆனால் அதை சீர் அமைப்பதற்கு அழகு படுத்துவதற்கு சிந்தித்துப் பார்ப்பதில்லை. அகத்தின் அழகு முகத்தில் தெரியும் என்பார்கள். எங்களுடைய அகமாகிய மனம் தூய்மையானதாகவும் அழகாகவும் இருந்தால்  முகம் அழகு பெறும். அந்த அகத்தைத் தூய்மை செய்வதற்காக அறுகுண சீரமைப்பு என்னும் ஒரு பாடத்தை நாம் கற்றோம். இவை ஒன்றும் எமக்குத் தெரியாத விடயம் இல்லை. தெரிந்ததுதான் ஆனால் செயல் படுத்தாமல் இருந்தோம். ஏனென்றால் உணர்ச்சிகளுக்கு முக்கியத்துவத்தை கொடுத்து எமக்கு அவசியப்பட்டதை நம் நினைத்துப் பார்க்காத காரணம் தான். இப்போது எம்மை நாம் உடலைவிட உள்ளத்தை தூய்மைப்படுத்தும் தியான வாழ்க்கை வாழுகின்றோம்.  இனி எங்கள் உடலும் சுத்தம் உள்ளமும் சுத்தம் அடையும் என்ற நம்பிக்கையும் அனுபவமும் எமக்குக் கிடைத்திருக்கின்றது. 

    “உள்ளத்தில் ஒளி உண்டானால், வாக்கினில் ஒளி உண்டாகும்" என்று பாரதி பாடியுள்ளார். அடிமனதில் இருந்து நல் வாழ்த்தாக அது வரவேண்டும். அது கேட்காமலே எமக்குக் கிடைக்க வேண்டும். எம்மைத் தேடி வரவேண்டும். 

                 வாழ்த்துகின்ற போது எமக்கு ஏற்படுகின்ற மனநிலை அதனைக் கேட்கும் போதும் ஏற்படுகின்றது. இந்த வாழ்த்தும் சந்தர்ப்பம் இரண்டு மனங்களும் ஒருமித்த மகிழ்ச்சியை அனுபவிக்கும் சந்தர்ப்பமாக இருக்கின்றது. உள்ளம் என்னும்போது அது எண்ணங்களின் உறைவிடம். ஒரு மனிதன் தன்னுடைய எண்ண அலைகளைக் கடத்தக் கூடிய ஆற்றல் பெற்றிருக்கின்றான். உடல் முழுவதும் பாய்ச்சப்படும் மின்சார அலைகளை நாம் பல இடங்களில் உணர்ந்திருக்கின்றோம். நகரும் படிகளில் கை வைக்கும் சிலருக்குத் திடீரென கைளில் மின்சாரம் அடிப்பது போன்ற உணர்வு ஏற்படுவதை உணர்ந்திருக்கின்றீர்கள். காந்தக் கதிர்விசை எம்மிடம் இருப்பதைச் சில சமயங்களில் எங்கள் தலைசீவும் சீப்பை எமது தலைமயிருக்கு மேலே பிடிக்கும் போது அத்தலைமயிரைச் சீப்பு கவர்ந்து இழுப்பதைக் கண்டிருப்பீர்கள். நாம் எதிர்பார்க்காமலே சிலரில் மிதமிஞ்சிய பாசம் ஏற்படுகின்றது, ஈர்ப்பு ஏற்படுகின்றது. சிறுகுழந்தைகளிடம் இதனை அவதானிக்கக் கூடியதாக இருக்கின்றது. இவையெல்லாம் உடலுக்குள் ஏற்படுகின்ற ஹோமோன்களாலும் எமது உடல் தனக்குள்ளே செயற்படுகின்ற செயற்பாடுகளாலுமே ஏற்படுகின்றது என்பதை அனைவரும் அறிந்து கொள்ள வேண்டும்.

    Britain‘s Got Talent, Ameriaca’s  Got Talent, Germany Super Talent போன்ற தொலைக்காட்சி நிகழ்ச்சிகளைப் பார்த்திருப்பீர்கள். அந்த நிகழ்ச்சிகளில் சிலர் Mind Reading  செய்து காட்டுவதைப் பார்த்திருப்பீர்கள். மனக்கட்டுப்பாடு, மனவசியம் போன்றவற்றைச் சரியான முறையில் கற்றுத் தம் மனதை கட்டுக்கோப்புக்குள் வைத்திருப்பவர்கள், மற்றவர்கள் மனதைப்படித்து விடுகின்றார்கள். அல்லது தம்முடைய மனதில் உள்ளவற்றை அவர்களுக்குச் செலுத்திவிடுகின்றார்கள். அப்போது தொடுகை முறை பயன்படுத்தப்படுகின்றது. அவர்களுடைய நெற்றிப்பொட்டிலே தொடுகின்ற போது ஒருவித மின்சாரம் பாய்ச்சப்படுவதாக பரிசோதனையின் போது அனுபவித்தவர்கள் கூறுகின்றார்கள். சுவாமிகள் செய்கின்ற கட்டிப்பிடி வைத்தியம் கூட இவ்வாறுதான் அமைகின்றது. அவர்கள் கைகளை தங்கள் கைகளுள் அழுத்துகின்ற போது எண்ண அலைகள் மற்றவருக்குப் பாய்ச்சப்படுகின்றது. இதனாலேயே வாழ்த்துபவர்கள் தலையிலே கைவைத்து தம்முடைய நல்ல எண்ணங்களை  வாழ்த்தப்படுபவர்களுக்குச் செலுத்துகின்றார்கள். 

    இதனாலேயே மாதா, பிதா, குரு வாழ்த்தைப் பெறும்போது நம்பி அவர்கள் கால்களில் விழுகின்றோம. அவர்களும் கைகளால் தலையைத் தொட்டு வாழ்த்தி வாழ்த்தப்படுபவர்களை எழுப்புகின்றார்கள். ஏனென்றால், பெற்றோர் தம்முடைய பிள்ளைகள் கெட்டுப் போகட்டும் என்று ஒருநிமிடம் கூட நினைக்க மாட்டார்கள். நல்ல ஆசிரியர் தன்னுடைய மாணவன் வளர்ச்சியிலே தன் வளர்ச்சியைக் காண்பார். தனது மாணவன் உயர்வுக்குத் தன்னை அர்ப்பணிப்பார். அவரே உண்மையான ஆசிரியர். அதனால், இவ்வாழ்த்துக்கள் நாம் அச்சம் இன்றி ஏற்றுக் கொள்ள வேண்டிய வாழ்த்துகள். உண்மையில் வாழ்த்துதல் என்பது Elektronik Power போன்றது. நல்ல மனதுடன் இல்லாமல் உள்ளே ஒன்றை வைத்து ஒருவர் வாழ்த்தினால் அது எம்மை அழித்து விடும் அணுகுண்டு போன்றது. மின்சாரம்  எம்மைத் தாக்காமல் இருப்பதற்கு றப்பரினால் சுற்றி பாதுகாப்பாக வைத்திருப்பார்கள். அந்த றப்பர் இல்லாவிட்டால் அந்த மின்சாரம் எம்மை அழித்துவிடும். அதிலிருந்து எம்மை நாம் பாதுகாக்க வேண்டுமென்றால், அதை மிஞ்சிய சக்தி எமக்கு இருக்க வேண்டும்.அந்த சக்தியைப் பெறுவதற்கு நாம் தியானம் செய்ய வேண்டியது அவசியமாகின்றது என்கின்ற அனுபவத்தைப் பெற்றேன்.

    எத்தனை தகவல்களைக் கொடுத்தாலும் அதை வாங்கிச் சுருக்கி வைத்திருக்கும் கணனி. ஏன் கைத்தொலைபேசியில் எவ்வளவு தகவல்களைச் சேகரிக்கின்றோம். அலைகள் எவ்வளவையும் சுருக்கவும் முடியும் பெருக்கவும் முடியும். அவ்வாறுதான் காந்த அலைகள். காந்த சக்தியை அடிப்படையாகக் கொண்டுதான் உடலும் உயிரும் இயங்கும். மனம் எந்தவகையில் இயங்கினாலும் ஜீவகாந்த சக்தியைத்தான் தாக்கும். ஒரு பொருளைப் பார்க்கும் போது எமது ஜீவ சக்தி வீணாகின்றது. அதேபோல் ஒரு வேலையைச் செய்கின்ற போது ஜீவகாந்த சக்தி செலவாகின்றது. அதனைப் பெருக்குவதறகு பயிற்சி தேவை என்னும் அனுபவத்தைப் பெற்றுக் கொண்டேன்.  

    இவ்வாறு பேசவிட்டால் என்னுடைய அனபவங்களை அடுக்கிக் கொண்டே போகலாம். களைத்துப் போன உங்களுக்கு என்னுடைய வார்த்தைகள் இவ்வளவு போதும் என்று நினைக்கின்றேன். இந்த சந்தர்ப்பத்தை எனக்கு வழங்கிய அமைப்பினர்க்கு மிக்க நன்றி வணக்கம் வாழ்க வளமுடன் வளர்க வேதாத்திரியம். உலகமெங்கும் வேதாத்திரி மகரிஷியின் புகழ் ஓங்க வேண்டும். வாழ்க வளமுடன் வாழ்க வளமுடன் வாழ்க வளமுடன். வாழ்க வையகம்



    வியாழன், 10 மார்ச், 2022

    தமிழ் வான் அவை சாதனைப் பெண் 2022




    தமிழ் வான் அவை நடத்தும் சாதனைப் பெண் 2022
    ´``´`´´``´`´`´´``´´``´´`´``´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`´`
    இந்தியா, இலங்கை,அமெரிக்கா,ஜெர்மனி ஆகிய நாடுகளில் இருந்து ஒவ்வொரு சாதனைப் பெண்களைத் தெரிவுசெய்து சாதனைப் பெண் 2022 விருது வழங்கிக் கௌரவிக்கின்றோம்


    திகதி : 13.03.2022
    நேரம்: ஐரோப்பிய நேரம் பி.பகல் 19.30
    இந்திய இலங்கை நேரம் பி.பகல் 15.00
    இங்கிலாந்து நேரம் பி.பகல் 14.00
    Zoom ID: 2509770769
    P.Word : 246810
    அனைவரையும் அன்புடன் அழைக்கின்றோம். சாதனைப் பெண்களை வாழ்த்தி அவர்களின் பெருமையைப் போற்றுவோம்.
    இப்பாடலை வழங்கிய சுவாமி விபுலானந்த அழகியற் கற்கை நெறி மாணவர்களுக்கு நன்றியைத் தெரிவித்துக் கொள்ளுகின்றோம்





     

    புதன், 23 பிப்ரவரி, 2022

    காதலின் 6 வகை நிலைகள் பற்றிய கலந்துரையாடல்


      தமிழ் வான் அவை நடத்தும் இணைய வழிப் பன்னாட்டு இலக்கியச் சந்திப்பு 27.02.2022 அன்று ஞாயிற்றுக் கிழமை நடைபெற இருக்கின்றது . காதலர் மாதம் என்ற காரணத்தினால் காதலின் 6 வகை நிலைகள் பற்றி 6 அறிஞர்கள் உரையாற்ற இருக்கின்றார்கள். அவர்களின் உரைகளில் இடம்பெறும் பாடல்களுக்கு பாடகர்கள் பாட இருக்கின்றார்கள். கீழுள்ள இணைப்பை அழுத்தி அனைவரும் கலந்துகொள்ளும்படி அன்புடன் அழைக்கின்றேன் 

    https://us02web.zoom.us/j/2509770769?pwd=M0kyckx0aHdVL0xNeGR4MnRzYkVGdz09



     





    புதன், 9 பிப்ரவரி, 2022

    கூடல் இழைத்தல்

     



    காற்றுக்கும் இலைக்கும் காதல். தட்டிவிட்டு சேர்ந்திருந்து பறந்து சென்றுவிடும். மீண்டும் மீண்டும் தன் கவனத்தை காட்டிச் செல்லும். கடற்கரைக்கும் அலைக்கும் காதல். வந்து வந்து மீண்டும் பிரிந்து சென்று விடும். தொடர்புகள் அறுவதில்லை. தொடர்ந்து இருப்பதும் இல்லை. பூமியைச் சூரியன் நெருங்க விட்டதில்லை. தூரப் போக அனுமதி தந்ததில்லை. சுற்றிச் சுற்றி வட்டமிடும் நிலை புரிந்திருந்தும் கண்காணிப்பில் வைத்துக் கொண்டே இருக்கின்றது. அணைப்பதில் சுகம் இருந்தாலும் அணைக்க விடுவதில்லை. இப்படி எத்தனையோ காதலர்கள் இளமையில் கண்ட காதலை தொடவும் முடியாது, தொலைக்கவும் முடியாது தொடருகின்றனர். தண்டவாளம் இரண்டும் ஒன்றாகச் சேர்வதில்லை. இங்கு காமம் போனது காதல் இருக்கின்றது. முறையற்ற காதலினால், இடைநடுவே முறிந்து போன காதலும் கணக்கில்லை. முடிவுரை எழுதி திருமணத்தில் கரைந்து போன காதலும் பல. 



    "காதலினால் சாகாம லிருத்தல் கூடும், கவலைபோம். அதனாலே மரணம் பொய்யாம். என பாரதி குயில்ப் பாடலிலே பாடினார்.  இது ஒரு புறம் இருக்க 


    எந்த உயிர்களுக்கும் காதல் உணர்வு பொதுவானது 


    "காக்கை குருவி எங்கள் ஜாதி - நீள் 

    கடலும் மலையும் எங்கள் கூட்டம்

    நோக்கும் திசையெலாம் நாமன்றி வேறில்லை

    நோக்க நோக்கக் களியாட்டம்|| என்று உயிர்கள் எல்லாம் ஒன்றிலிருந்துதான் பலவாகிப் பெருகின. அதனால் எல்லாமே எங்கள் ஜாதி என்று பாரதி பாடினார். 


    எங்கள் வீட்டுப் பலகணையில் ஒரு பறவை பறந்து வந்து அமர்ந்தது. சற்று நேரங்கழித்து அதனருகே இன்னுமொரு பறவை வந்தமர்ந்தது. தன் காதலன் வந்தமர்ந்ததைப் பார்த்த பறவை சற்று நகர்ந்தது போய் நின்றது. அதுவும் விடாது கிட்டக் கிட்ட நெருங்கியது. ஊடலின் அழகான காட்சியை அமைதியாய்க் கண்காணித்தேன். நீண்ட நேர சம்பாஷணையின் அந்நியோன்யத்தின் உச்சத்தில் இறுதியாக இருவரும் ஒன்றாகப் பறந்து சென்ற காட்சி. ஊடலும் அதன்பின் வரும் கூடலும் உச்சக் காதலை உணர்த்தும் என்பதை நேரடியாக உணரக்கூடியதாக இருந்தது. 


    துடிஅடிக் கயந்தலை கலக்கிய நன்னீரைப்

    பிடிஊட்டிப் பின் உண்ணும் களிறு, எனவும்

    உரைத்தனரே|| 


    என்னும் பாடலில் குட்டியானை கலக்கிய நீரை பெண் யானைக்குக் கொடுத்து மீதமிருந்தால் தான் உண்ணுகின்ற ஆண்யானையின் காதலை கலித்தொகை எடுத்துக் காட்டுகின்றது. 


    சுனைவாய்ச் சிறுநீரை எய்தா தென்(று) எண்ணியப்

    பிணைமான் இனி துண்ண வேண்டிக் - கலைமாத்தன்

    கள்ளத்தின் ஊச்சும் சுரமென்பர் காதலர்

    உள்ளம் படர்ந்த நெறி


    சுனைநீர் சிறிதளவே இருக்கின்றது. தாகத்தில் இருக்கும் பெண்மான் தன்னை எண்ணிக் குடிக்காது என்று எண்ணிய ஆண்மானானது அச்சுனைநீரில் வாயை வைத்துக் குடிப்பது போன்று பாசாங்கு செய்கின்றது என்பதை இப்பாடல் மூலம் மறைப்பொறையனார் ஐந்திணை ஐம்பதில் பாடினார். 


    காதல் கொண்ட மான்களுக்கு உள்ள ஒரு வழக்கம் ஒரு பெண்மனைத் துணைக் கொள்ள எண்ணிய  மான்கள் பெரிதான சத்தமிட்டுக் கத்துகின்றன. எந்த மான் பெரிதாக கத்துகின்றதோ, அந்த மானையே பெண்மான் கூடுமாம். ஆண்மான்கள் பெண்மான்கள் அறுகம்புல்லைத் தின்னுமாறு செய்து, தெளிந்த நீர் ஓடுகின்ற கானாற்றின் மணற்கரையிலே தூங்கச் செய்து அவ்வாறு தூங்கும் போது இடையூறு வராதபடி காவலும் காத்து நிற்கின்றன. இதேபோல் பெண்யானையின் பசியையும் கன்றின் பசியையும் தீர்ப்பதற்காக ஆண்யானை முற்றாத மூங்கிலின் முளையைத் தந்து அன்போடு உண்ணச் செய்விக்கும். இவ்வாறு அகநானூறு பாடல்கள் பல உயிரினங்களின் காதலை அழகாக எடுத்துக்காட்டுகின்றன.


    இந்தோனேசியாவில், பலினீஸில் ~~மானுக் தேவதா" என்னும் தெய்வங்களின் பறவை என்று அழைக்கப்படும் பறவையானது,  ஒரு துணையை ஈர்க்க முயற்சிக்கும்போது ஒரு இடத்தைத் தெரிவு செய்கின்றது. அந்த நிலத்திலே கிடக்கின்ற சுள்ளி, கல் போன்றவற்றையெல்லாம் தன்னுடைய சொண்டினால் அகற்றித் துப்பரவு செய்த பின் அந்த இடத்திலே நின்று நடனமாடவும் பாடவும் செய்கிறது. அந்நடனத்தில் மயங்கிய பெண் பறவை இந்நடனத்தில் மயங்கி அதனோடு இணைந்து நடனமாகி ஒன்றிணைகின்றது. இதேபோல் ஆண் மூட்டைப்பூச்சியின் இனப்பெருக்க உறுப்பு ஒரு கம்பி போன்று கூர்மையானது. இந்த ஆண் மூட்டைப் பூச்சியானது காதல் கொண்ட பெண் மூட்டைப்பூச்சியின் அடி வயிற்றிலே இந்தக் கம்பி போன்ற கூர்மையான பகுதியால் குத்தி விந்தணுக்களை உள்ளே செலுத்திவிடும். இந்த இடம் காயப்பட்டு பெண் மூட்டைப்பூச்சிக்குத் தாங்க முடியாத வலியை ஏற்படுத்திச் சில கணங்களில் மறைந்து போகும். இது இயற்கை அதற்கு அழித்திருக்கும் கொடை ஆகும். தாம் விரும்பிய காதலியை அடையக் காதலர்கள் நடத்துகின்ற நாடகங்களை இந்த ஆண் மூட்டைப் பூச்சி  காட்டித் தருகின்றது.

    பாலியல் முதிர்ச்சியடைந்த நத்தைகளின் தலைப்பகுதியில் னுயசவ ளுயஉ என்னுமொரு பை இருக்கிறது. அதறற்குள் ஒரு கூர்மையான கம்பி போன்று இருக்கின்றன. இது லவ் டொட்ஸ் எனப்படுகின்றது. இந்த லவ் டொட்ஸை மற்றைய நத்தையின் தலையிலே செலுத்தும். அப்பொழுது அதற்குள் இருக்கும் ஹார்மோன்; நத்தைக்குள் செல்லும் அதற்குள் இருக்கும் விந்தணுக்கள் மற்றைய நத்தைக்குள் பரவுகின்றன. காதலைப் பரிமாறும் இந்த வித்தை நத்தைகளுக்கே உரியன. இவ்வாறு உலகத்திற் பிறந்த அனைத்து உயிர்களிடத்திலும் காதல் மேம்பட்டிருப்பதையும் அதன் மூலம் உயிர்களின் விருத்தியையும் நாம் காணக்கூடியதாக இருக்கின்றன.


    இவ்வாறு காதலுக்காகத் தம்மைத் தியகம் செய்வதும், விட்டுக் கொடுப்பதும் காலம் காலமாக அனைத்து உயிர்களிடத்திலும் காணப்படுகின்ற பண்பு. தலைவனிடம் காதல் கொண்ட தலைவி அவன் தன்னை மணப்பானோ என்று அறிய தரையிலே மண் பரப்பி தன்னுடைய கண்களை மூடி விரலினால் வட்டம் வரைவாள். தொடங்கிய இடத்தில் விரல் போய் நிற்க வேண்டும். அப்போது தலைவி நினைத்தது நடக்கும் இதனைக் கூடல் இழைத்தல் என்று கூறுவார்கள். இதில் ஏதாவது தவறு வந்து விடுமோ என்று கூடல் இழைத்துப் பார்க்க அஞ்சுகின்ற பெண்களும் உண்டு. இதேபோல் காதலியை அடைவதற்காக வட்டக்கல்லைத் தூக்குவதும், ஏறு தழுவுதலும். வரைபாய்தலும், மடல்மா ஏறதலும் போன்ற சம்பவங்களை இலக்கியக் காதல் மெய்ப்பித்துக் காட்டியிருக்கிறது. தமது காதலில் வெற்றி கிடைப்பதற்காக தமது கொள்கையை விட்டுவிடாது கடைப்பிடித்து காதலர்கள் வாழ்ந்து காட்டியுள்ளார்கள். 


    ஆனால், இன்று நட்பும், காதலும், கணவன் மனைவி உறவும், பெற்றோர் பிள்ளைகள் உறவும் என்று அனைத்தும் கேள்விக்குறியாக காணப்படுகின்றன. உண்மைக் காதல் நினைத்து ஏங்குவதில் தொடர்கிறது. திருமணமான காதல் பிரிவை எதிர்நோக்கிக் காத்திருக்கின்றது. இருப்பினும் காதலுக்கு முடிவில்லை. காலம் உள்ளவரை தொடரும். 


    மாசி மாத வெற்றிமணி பத்திரிகையில் வெளிவந்தது 


    கர்ப்பக்கிரக ஆய்வுகூட அன்பளிப்பு

    கழுத்தில் தாலி ஏறிவிட்டால் புதுமணத் தம்பதிகளிடம் கேட்கும் அடுத்த கேள்வியாக அமைவது வயிற்றில் பூச்சி புழுக்கள் இல்லையா? என்பதே. இந்தக் கேள்வி ...