அன்னையர் தினம் 2016

புனிதமான உறவுக்குக் காரணமானவர்களுக்கும்

உன்னத உலகத்தை உருவாக்கித் தருபவர்களுக்கும் 

கண்ணுக்குள் உறவு வைத்து

காலமெல்லாம் தம் பிள்ளைகளைக் காப்பவர்களுக்கும்

அன்புக்கும் அரவணைப்புக்கும் இலக்கணமானவர்களுக்கும்  

இன்றைய நாள் உரித்தானது 

அனைத்து அன்னையர்க்கும் அன்னையர் தின வாழ்த்துக்கள். 

நீர்கொழும்பு விஜயரெத்தினம் இந்து மத்திய கல்லூரி பழைய மாணவர்களின் நயனங்களின் தேடலும் முக்கோண முக்குளிப்பு நூல் அறிமுக விழாவும்

               நீர்கொழும்பு விஜயரெத்தினம் இந்து மத்திய கல்லூரி பழைய                                                       மாணவர்களின்  நயனங்களின் தேடலும் 

                                                 முக்கோண முக்குளிப்பு நூல் 

                                                         அறிமுக விழாவும்

         

30.04.2016 அன்று நீர்கொழும்பு விஜயரெத்தினம் இந்து மத்திய கல்லூரி பழைய மாணவர்கள் சங்கம் இங்கிலாந்து Harrow  என்னும் நகரத்திலே நயனங்களின் தேடல் 2016 என்னும் நிகழ்வினை மிகச் சிறப்பாக நடத்தியது. இந்நிகழ்விலே முன்னாள் நீர்கொழும்பு விஜயரெத்தினம் இந்து மத்திய கல்லூரி ஆசிரியராகிய என்னுடைய முக்கோணமுக்குளிப்பு என்னும் நூலும் அறிமுகம் செய்யப்பட்டது. இந்நிகழ்வில் இளைப்பாறிய முன்னாள் அதிபர் திருமதி. அசலாம்பிகை கல்யாண சுந்தரம் அவர்கள் பிரதம விருந்தினராகக் கலந்து கொண்டார். 

நான் சிறப்பு விருந்தினராகக் கலந்து கொண்டேன். பழைய மாணவனும் நூலகவியலாளருமான திரு. செல்வராஜா நடராஜா அவர்களும் இந்நிகழ்வினில் கலந்து கொண்டது இந்நிகழ்ச்சிக்கு மேலும் பெருமை சேர்த்தது.

            இந்நிகழ்விலே பழைய மாணவர்களின் பிள்ளைகளின் நடனங்கள், வில்லுப்பாட்டு, பாடல்கள் போன்ற நிகழ்ச்சிகள் இடம்பெற்றன. வரவேற்புரையினை திருமதி. ராகினி அருண்குலசூரிய அவர்களும் நன்றியுரையினை திருமதி. சுபா ஜூலியன் அவர்களும் வழங்கினர். தலைவர் வர்மன் மங்களராஜா அவர்கள் தனது தலைமையுரையிலே நீர்கொழும்பு விஜயரெத்தினம் இந்து மத்திய கல்லூரியின் வளர்ச்சிக்கு சென்ற வருடம் கணனிகள் வழங்கியமை பற்றியும் இனி வரும் காலங்களில் இப்பாடசாலையின் வளர்ச்சிக்கு தங்களின் மேலான ஒத்துழைப்பு இருக்கும் என்று உறுதியளித்தார். பிரதம விருந்தினர் தனது உரையில் பழைய மாணவர்களின் ஊக்கத்தினையும் ஒத்துழைப்பினையும் பாராட்டிப் பேசினார். நான் மாணவர்களைக் கற்பிக்கும் போது ஏற்பட்ட அநுபவங்களையும் இச்சங்கத்தினை வளப்படுத்துவதற்காக மாணவர்களின் ஒத்துழைப்புத் தேவை என்பதனையும் வலியுறுத்திப் உரையாற்றினேன். திரு. செல்வராஜா நடராஜா அவர்கள் இப்பாடசாலை ஆரம்பகால கட்டங்களை நினைவுறுத்திப் பேசினார். 

       முக்கோணமுக்குளிப்பு என்ற நூலினை நூலகவியலாளர் செல்வராஜா நடராஜா அவர்கள்  விமர்சனம் செய்தார். வாசிப்புப் பழக்கம் அருகி வரும் இன்றைய காலகட்டத்தில் இந்நூல் வாசிப்பின் மேன்மையை எடுத்துக்காட்டுவதாகவும்  கல்வித்திட்டத்துடன் இணைக்கப்படக்கூடிய தகுதியை உடையதாகக் காணப்படுவதாக எடுத்துரைத்தார். பாடசாலை முன்னாள் அதிபர் திருமதி அசலாம்பிகை கல்யாணசுந்தரம் அவர்கள் முதல் பிரதியை நூலாசிரியரிடமிருந்து பெற்றுக் கொண்டார். நான் எனது ஏற்புரையில் இந்நூல் நீர்கொழும்பு விஜயரெத்தினம் இந்து மத்திய கல்லூரியிலே முன்னாள் ஆசிரியர்கள், மாணவர்கள், மத்தியில் அறிமுகம் செய்யப்படுவது இரட்டிப்பு மகிழ்ச்சியையும் பெருமையையும் அளிப்பதாகக் கூறினேன். மூன்று பரிமாணங்களை எடுத்துள்ள இந்த நூலின் தோற்றம் உருவான தன்மை பற்றிய சகல விடயங்களையும் நன்றியுணர்வினையும் எடுத்துரைத்தேன். ஒருமேடை இரு நிகழ்வாக நயனங்களின் தேடல் மிகச்சிறப்பாக நடைபெற்றது.

எனது இந்நூல் பன்னாட்டு எழுத்தாளர் மாநாட்டில் 22.05 மலேசியாவிலும், 25.05 சிங்கப்பூரிலும் அறிமுகம் செய்யப்படுவதாக உள்ளது. 

காத்திருப்பு

பிரண்டு படுத்த படுக்கையிலே தடவிப் பார்த்த கைகளுக்குத் தட்டுப்படாத மனைவி தேகம் உணர்ந்து துடித்தெழுந்தான் விஜய். 

என்ன செய்கிறாள் இவள். இன்னும் நித்திரை கொள்ளாமல் அவன் கைபட்டு மின்சாரம் தொழிற்பட்டு மின்விளக்கு வெழுத்தது. அறையின் வெளியே அவதானித்தான். சமையலறை வெளிச்சம் கதவிடுக்கூடாக கண்களுக்குப் பட்டுத் தெறித்தது. சமையலறை சென்றான். அங்கு மேசையிலே கைநீட்டிக் கையே தலையணையாய் மேசைமேல் முகம் புதைத்து தனை மறந்து தூங்கிக் கொண்டிருந்தாள், கீதா. "கீதா......" தட்டி எழுப்பினான். 

"பிள்ளை வந்திட்டாளா, பிள்ளை வந்திட்டாளா....."தடுமாறினாள் கீதா

"வராமல் எங்கே போகப் போகிறாள். வருவாள் தானே. வந்து படு. இன்றைக்கு லெக்ஷர்ஸ் முடிய நேரமாகி விட்டது என்று நினைக்கின்றேன். வந்து எழுத்துச் சாப்பிடுவாள் தானே|" அதட்டலாகச் சொன்னான் விஜய். ஆனால் அதை ஏற்றுக் கொள்ளும் நிலையில் அவள் இல்லை. 

"நீங்கள் போய்ப் படுங்கள். நாளைக்கு வேலை இருக்கிறது. நான் சாப்பாடு கொடுத்திட்டு வந்து படுக்கின்றேன்" என்று கூறித் தன் கையில் பத்திரமாய் வைத்திருந்த போட்டோவை ஒருதரம் பார்த்தாள். என்ன லட்சணமான பெடியன். குடும்பமோ, உத்தியோகமோ, அழகோ என்ன குறை இருக்கிறது. இவனை மட்டும் ஜெசிக்குக் கட்டிக் கொடுத்துவிட்டால், நிம்மதியாக இருக்கலாம். தன் மகளைத் தரமான ஒருவனிடம் ஒப்படைக்க நாளும் பொழுதும் தேடிக் கண்டுபிடித்த ஒருவனுடன் காத்திருந்தாள் கீதா. 

"என்னவென்றாலும் செய். நான் சொன்னால், கேட்கப் போகின்றாயா? திரும்பி வந்து படுக்கைக்குப் பாரமானான் விஜய். கண்மூடியவுடன் நித்திரையாள் அவனை தாலாட்டிவிட்டாள். 

மணி இரவு பதினொன்று.  உணவகம் இன்னும் ஒரு மணித்தியாலத்தில் உறங்க வேண்டும். கலகலப்பு மெல்லமெல்லக் குறைந்தது. ஜெசி தன்னுடைய கைகளில் அடங்கிக் கிடந்த ராமுடைய கைகளை விலக்கினாள். 

"அம்மா காத்திருப்பாள். நான் போக வேண்டும். இன்னும் எத்தனை வருடங்கள் இப்படி கள்ளமாய் வாழ்க்கையைக் கடத்துவது. நாம் தானே உறவுக்கு அத்தாட்சிப்படுத்திவிட்டோம். உயிருள்ளவரை எனக்கு நீங்கள்தானே. புதியபாதை வகுப்பதற்கு பொறுப்பான பதவி தேவை. அதற்கு சிறப்பான படிப்பு அவசியம் என்று தானே, எல்லாவற்றையும் மறைத்துவிட்டோம். உழைக்கும் காலம் சேர்ந்தே உழைத்துத் தரமான வாழ்வு காண்போம். இப்போது நாம் படிப்பதற்கு வசதி தேவையில்லையா! எங்கே போவோம். சட்டரீதியாகக் கணவன் மனைவி. ஆனால், எங்கள் பெற்றோருக்கு நாங்கள் செல்லப்பிள்ளைகள். திட்டமிட்டுத்தானே தொடங்கினோம். பொறுத்திருப்போம்.  இன்னும் 2 வருடங்கள் காலத்தைக் கடத்த வழிதான் இல்லையா? 

ஒரு இளம் தம்பதியர், கள்ளங்கபடமில்லாக் குழந்தைகளாய்ப் பெற்றோருடன் வாழும் நிகழ்வுடன் பிரயாணத்திற்காகப் பிரிந்து பெற்றோரிடம் சென்றனர். கதவு திறக்கப்படும் ஓசை கேட்டு கண்விழித்தாள், கீதா. என்ன ஒரு அபார சக்தி. தாய்ப்பாசத்தை  ஒப்பிட்டுக் கூற வார்த்தைகளே இல்லை. எங்கிருந்தாலும் ஒரு காந்த சக்திபோன்ற உணர்வு பிள்ளைகளிடம் இழுத்தெடுக்கும். எவ்வாறான இரைச்சலிலும் இடரிலும் அழும் தன் குழந்தை ஓசை துள்ளியமாய் ஒலிக்கும். 

"ஜெசி வந்திட்டாயா? கெதியாக முகத்தைக் கழுவிட்டு வா. வந்து சாப்பிடு"

"எனக்குப் பசிக்கல்ல"

"இரவில் சாப்பிடாமல் படுக்கக் கூடாது. நீ வா! நான் குழைத்து ஊட்டிவிடுகிறேன்"

உடைமாற்றித் தாய் ஊட்டிய உணவை வாய்க்குள் அசைபோட்டாள் ஜெசி. உணவுண்ணும் சமயத்தில் தன் மனக்கிடங்கில் உள்ளவற்றை கீதா மெதுவாக எடுத்துரைத்தாள். 

"அம்மா இப்ப நான் படிக்கிறதா? கல்யாணம் கட்டி வாழ்றதா? சும்மா யாரோ ஒருவனைக் கொண்டுவந்து என்ர படிப்பைக் கெடுக்காதீங்க. படிப்பு முடிஞ்சாப் பிறகு இதெல்லாம் வைத்துக் கொள்ளுங்கள். எடுத்தெறிந்து பேசிவிட்டு சட்டென்று எழுந்து படுக்கைக்குப் போய்விட்டாள், மகள் ஜெசி.

சமையலறையை மூடிவிட்டுத் தன் எண்ணத்திற்கு முற்றுப்புள்ளி வைத்துவிட்டு மகள் கல்விக்கரை கண்டவுடன் ஏற்ற துணை தேடுவோம், இல்லையென்றால், இப்பொருத்தத்தைக் காத்திருக்கச் சொல்வோம் என்று முடிவெடுத்தவளாய் படுக்கையை  நாடினாள், அப்பாவித் தாய். 

பெற்றோரை உறிஞ்சிக் கல்வியை முடித்துவிட்டுத் தன் மனதுக்குப் பிடித்த ராமுடன் சிறப்பான வாழ்வு காணக் காத்திருந்த ஜெசி சட்டரீதியாக ராம் அளித்த மோதிரத்தை முத்தமிட்டபடி கண்ணுறங்கினாள்.

உடல் உழைத்து உடல் இளைத்து
உலகம் இழக்கும் வரை – எங்கள்
பிள்ளைகள் பிள்ளைகள் பிள்ளைகள் - என்று
ஏங்கும் பெற்றோர்கள் பேர் அப்பாவிகள்

முட்டாள் முட்டாள் ஏப்ரல் முட்டாள்

            

ஏப்ரல் மாதம் முதலாம் திகதி அடுத்தவரை முட்டாளாக்கிப் பார்ப்பதில் அளவில்லா ஆனந்தம் கொள்ளுகின்றோம். எப்படி இப்படி ஒருநாளைத் தெரிவுசெய்து அடுத்தவருக்கு அதிர்ச்சி கொடுத்து, அழவைத்து அதன்பின் சிரிக்கவைக்கும் விளையாட்டு அரங்கேறியது? காரணமில்லாது எதுவுமில்லை. எனவே நான் அறிந்ததை இப்பதிவில் அறியத் தருகின்றேன். 

           ரோமானியர்கள் தமது நாட்காட்டியின்படி ஏப்ரல் 1ம் திகதியையே புத்தாண்டு தினமாகக் கொண்டாடினார்கள். இந்நாளிலே கடவுளுக்கு பலி கொடுத்து, அன்பளிப்புக்கள் வழங்கி, கோலாகலக் கொண்டாட்டமாக விருந்துகள், ஆடல் பாடல் என்று ஆhப்பாட்டமாகக் கொண்டாடினார்கள். ஐரோப்பா முழுவதும் ஏப்ரல் முதலாம் திகதியையே புதுவருடமாகக் கொண்டாடினார்கள். 

           பிரான்ஸ் நாட்டைச் சேர்ந்த போப் கிரகோரி என்பவர் ஜனவரி 1ம் திகதியே புதுவருடம் கொண்டாடப்பட வேண்டும் என்று 1562ம் ஆண்டு அறிவித்தார். ஆனால், இதனை ஏற்றுக் கொள்ளாத மக்கள் ஏப்ரல் முதலாம் திகதியையே தொடர்ந்து புதுவருடமாகக் கொண்டாடினார்கள். 1700 இல் ஜேர்மனி, நோர்வே, டென்மார்க், போன்றவையும், இங்கிலாந்து 1752 இலும், ஸ்கொட்லாந்த் 1660 இலும், ஜனவரி முதலாம் திகதியை புதுவருடமாக ஏற்றுக் கொண்டன. 

        தொடர்ந்து ஏப்ரல் 1ம் திகதியைப் புதுவருடமாகக் கொண்டாடியவர்களை முட்டாள்கள் என்று கருதியதனால் இத்தினம் முட்டாள்கள் தினமாகப்பட்டது. இன்றைய தினம் பிரான்ஸ் நாட்டில் ஒரு கேலிக்கை என்னவென்றால், கடதாசியில் மீன் கீறி வெட்டி  அதனை நண்பர்கள் முதுகில் ஒட்டிவிடுவார்கள். முதகில் மீனுடன் திரிபவர்களை ஏப்ரல் மீன் என்று கேலி செய்வார்கள். 

அப்படியென்றால் சித்திரை வருடப்பிறப்பைக் கொண்டாடும் நாங்கள்????? 

பிரேமை

                   

                    

மூளைக்குள்ளே பாய்கின்ற மின்சாரம் அதிவேகமாக தொழிற்படத் தொடங்குகின்றது. பதிந்து வைத்த ஒரு பகுதி மாத்திரம் அடிக்கடி பளிச்சிட்டுக் கொண்டிருக்கின்றது. அவள் கவனத்தைத் திசை திருப்ப வேறு நிகழ்ச்சிகளை முன் கொண்டு வருகின்றாள்.   ஆனால், அதுவோ அதிவேகமாக அப்பக்கமே இழுக்கின்றது. மூளைக்குள்ளேயே படுபோராட்டம். நினைவும் மறுப்பும் எதிர்த்து நின்று எகிறிப் பாய்கின்றன. காண்போர் காதுகளுக்கெல்லாம் இதுபற்றிய பேச்சே தொடர்கின்றது. இருளிலே அவ்வுருவம் இருப்பது போல் உணர்கின்றாள். தனிமையில் அவள் வார்த்தைகள் மீண்டும் மீண்டும் ஒலிப்பது போல் உணர்கின்றாள். நடந்த சம்பவங்களுக்கும் நடக்கின்ற சம்பவங்களுக்கும் முடிச்சுப் போட்டுப் பார்க்கின்றாள். தான் உயிர்நீப்பின் மரணச்சடங்குகள் என் உடலுக்கு வேண்டாம். என் உடலை மருத்துவமனைக்கு ஒப்படைத்து விடுங்கள் என்று வீட்டிலுள்ளோருக்கு கட்டளையிடுகின்றாள். என் உயிர் நீப்பின் என் உடலுக்கு எரியூட்ட வேண்டாம். காக்கைக்கும் புழுவுக்கும் என் உடல் உணவாகட்டும் என்று கூறிய வள்ளுவர் வாக்குப் போல் உத்தரவிடுகின்றாள். 

         இவள் விபரீத நடவடிக்கைகள் கண்ட கணவன் வைத்தியரிடம் அவளை அழைத்துச் செல்ல மனஅழுத்தம் என மருத்துவர் பதிலிறுக்கின்றார். மனமாற்ற நடவடிக்கை எடுக்காது விட்டால், விபரீதத்தை எதிர்நோக்க வேண்டிவரும் என்று மருத்துவரும் அறிவுறுத்துகின்றார். ஏனென்றால், அவள் வாழவேண்டும். அவளால் உருவாக வேண்டிய ஒரு உலகம் இருக்கின்றது. அவள் உதவியை நாடும் உள்ளங்கள் இருக்கின்றன. இவ்வாறுதான் துணையை இழந்த உள்ளங்கள் தனிமைக் கொலையைச் செய்கின்ற ஐரோப்பிய நாடுகளில் தவிக்கின்றன. மறதிநோயும், மயக்கநோயும், மனநிலை தடுமாறும் மந்த நோயும் ஆட்டிப் படைக்கின்றன. 

         இவள் நிலை பலருக்கு நடிப்பு, இவளுக்குத் துடிப்பு, எல்லோரும் ஒரே மனநிலையில் இருப்பார்கள் என்று சொல்வதற்கில்லை. வளர்ப்பு முறையாலும் வளர்ந்த சூழ்நிலையாலும் கல் மனம் கொண்டார் எதையும் தாங்கும் இரும்பு போலாவர்.  பலர் கூறும் வார்த்தைகளும் ஒரு காதால் வந்து மறு காதல் மறைந்துவிடும். ஆனால், இளகிய மனம் தன் நிலையை இழந்து விடும். கடமையுள்ளவர்கள் வெளியே செல்ல வீட்டில் தனித்திருக்கும் பெண்கள் மனநிலை பாதிக்கப்படுவது இயற்கை. இதனாலேயே ஐரோப்பிய நாடுகளில் ஒருவர் இறந்தால், குடும்பத்துடன் இணைந்து ஒப்பாரி வைப்பதை விட்டுவிட்டு அக்குடும்பத்தைச் சிரிக்க வைப்பதற்காக இருக்கும் இடம் விட்டு உறவினர்கள் அவர்களை வேறு இடத்திற்கு அழைத்துச் செல்வார்கள். பல்வேறுபட்ட மூளைப்பதிவுகளைப் பாதிக்கப்பட்டவர்களுக்கு ஏற்படுத்துவார்கள். இது எமது கலாச்சாரம் இல்லையென்று திரும்பத்திரும்ப அதேசம்பவத்தை எடுத்துரைத்து 1 வருடம் எந்தவித நிகழ்வுகளுக்கும் சம்பந்தப்பட்டவர் சமூகமளிக்கக் கூடாது என்று கட்டளையிட்டு, சிரித்துவிட்டால், சிரிப்பதைப் பாருங்கள். கொஞ்சம் கூடக் கவலையில்லாமல் என்று மறைவாகப் பேசி, மனக்கொலை செய்யும் எமது சமுதாயம் என்றுதான் வெளிச்சம் காணப் போகின்றதோ. 

         வெள்ளைக்காரர் போல் நடையும் உடையும் மாத்திரம் போதாது. நல்பழக்கவழக்கங்களும் கற்றுக் கொள்ள வேண்டும், மனிதத் தன்மையையும் மனம் கொள்ள வேண்டும். 

காதலர் தினம் 2016

உலகவலத்தில் மனிதன் உருவாக உதவிடும் காதல் 
காதல் இல்லையெனில்   உயிர்கள் தான் ஏது?                                                                                                   
கடவுளுக்கும் புழு பூச்சிக்கும் காதல்
கண்டவுடன் கவர்வது காதல் 
காத்திருக்காமல் மலர்வது காதல்
வார்த்தைக்குள்ளே தேனைக் கலந்து 
வாரி இறைப்பது காதல்
அணைப்புக்குள்ளே மலரை வைத்து
அள்ளிச் சொரிவது காதல்

பொய்யும் மெய்யும் கலந்தே தருவது
போதை மனிதனாய் உலாவ விடுவது
பெற்றவர் கண்களை மறைக்க வைப்பது
தமக்குள்ளே ஒரு உலகை வைத்து
தரையில் நிற்காது வாழ வைக்கும் காதல்

உலகம் உள்ளவரை தொடரும் காதல்
உயிர்கள் உள்ளவரை மலரும் காதல்
காதலும் தேய்வதில்லை 
காதலர் தினமும் ஓய்வதில்லை

2016 ஏ

       

பூமித்தாயின் புதுவரவே!

அண்ட சுழற்சின் பிறப்பே!

தமையனை வழி அனுப்பித் 

தரணி ஆள வந்தவனே!

ஓராண்டே கூட வந்தாலும்

ஓராயிரம் சுமைகள் தருபவனே!

ஓராயிரம் புதுமைகள் படைப்பவனே!

உனை வரவேற்க

வான வேடிக்கைகள் 

வைன்(wine) உடைப்புக்கள்

 முத்த அணைப்புக்கள்

ஆலய மணியோசைகள்

அலங்கார ஆடைஅணிகள்

ஆரம்பமோ ஆனந்தம் 

ஆனாலும் மனதில் ஆதங்கம்

வெண்பஞ்சாய் வருவாய் என 

விழி வைத்துக் காத்திருந்தோம் 

வரும் போதே ஏமாற்றி

வாரி மழை இறைக்கின்றாய்

வசந்தத்தைத் தருவாயா? தமையன் போல்

வாரி உயிர் எடுப்பாயா?

வந்து சொல்லும் செய்தியென்ன?

அனைத்து உறவுகளுக்கும் புதுவருட நல் வாழ்த்துக்கள்