எண்ணத் திடம் சுடராய் மிளிரட்டும்

உயிரைத் தினமும்  குடித்திடும்
உடனிருந்தே கொல்லும்  நோய்
வெளியே இருந்து வரும் மருந்தே - உன்
உடல் நோயைத் தீர்க்கும்

இடியாய் வரும் துன்பமும்  ஒருநாள்
மழையாய் மறுதலிக்கும்
இன்பமும் துன்பமும்
இணைவதுதான் இவ் வாழ்க்கை
இழந்துவிட்ட  இன்பம்
இணைகள் சேர இணைந்துவிடும்

பகிர்ந்தளிக்கும் துன்பம்
படிதாண்டி ஓடிவிடும்
எண்ணி எண்ணி மாய்வதல்ல
இவ் வாழ்க்கை
எதிர்நீச்சல் போட்டுவிடு
எண்ணமதைச் செயல்படுத்து

எள்ளிநகை யாடிட இதுவல்லோ நேரம்
எடுத்து வைக்கும் காலடிகள்
ஏற்றத்தைக் காட்டிவிடும்
பனிகாலம்  உறங்கும் மரம்
கோடையிலே குதூகலிக்கும்
கரை வந்த அலை கடல் நோக்கி
மீண்டும் திரும்பிவிடும்

கன்னத்துக் கரம் கடுதியாய் விலகட்டும்
எண்ணத் திடம் சுடராய் மிளிரட்டும் 

kathalar thinam.wmv

பனித் துளியும் உலகியலும்

   

பஞ்சுப்பொதி யுடைத்து பால்வெளி வீதிநின்று
பாருலகு காணவென்று பறந்து வந்த பனிக்குழாம்கள் 
விண்ணெங்கும் பரந்து வீதியெங்கும் படுக்கை போட்டு
வீடுகளின் கூரைகளில் ஆடைகளாய் அலங்கரித்து
விருட்சங்களின் மேனிகளை வெள்ளாடையாய்ப் போர்த்தி
இலையிழந்த கிளைகளிலே இன்பமாய் அமர்ந்திருக்கும்
நிலையில்லா அழகை ரசிப்பதற்கு ஆயிரங் கண்கள் போதாது

பூமியிலே பிறப்பெடுத்த பச்சைக் குழந்தையென 
பாவங்கள் படியாத பரிசுத்த வடிவு கொண்டு
பறந்து வரும் பனிக்குழாம்கள் வீதிக்கு வந்தவுடன்
சகதியும் சேறுமாய் சாக்கடை அசுத்தமாய் 
உருமாறி உருக்குலைந்து அருவருக்கும் தோற்றமாய்
உருமாறும் தோற்றமாம்போல் மானுட வாழ்க்கையும்
உருவாகும் போது உன்னதமாய் மாசுமறுவற்றிருக்கும்

பொல்லாத பூமியிலே பொன்னெனப் பிறந்தவுடல் 
பூமிக்கு விலக்காகி வாழ்வுக்கு வஞ்சனையாகி
பொல்லாங்கு வாழ்க்கையிலே புகழுக்காய் பொய்யுரைத்து
நிலையில்லா வாழ்வையெண்ணி பேராசை மிகக்கொண்டு
முறையற்ற செயல்களினால் குறையுற்ற பணிசெய்து
அடுத்தவரை ஏமாற்றி அவருழைப்பில் குளிர்காயும்
மானிடப் பிறப்பும் பனியழகுபோல் மாறிவிடும்

இன்றைய சிந்தனை

                                     

                                                          

சமுகத்திற்காய் தன்னை இழப்பதும் 

கடமையில் கருத்தாவதும் 

ஆலயம் தொழுவதிலும் மேலான தவம் 

சந்தேகம் 

      

1. கல்வியில் சந்தேகம் கொள்பவன் நிறைவான அறிவு பெறுவான். வாழ்வில் சந்தேகம் கொள்பவன் வாழ்வை இழப்பான்.
2. பிள்ளைகளிடம் இடும் சந்தேகம் என்னும் முதலீட்டின் பயன் அவர்களிடம் இருந்து பெரும் வெறுப்பு என்னும் நட்டமே 
3. நம்பிக்கை கொண்டு வளர்க்கும் பிள்ளை முன்னேற்றம் காணும்  சந்தேகம் கொண்டு வளர்க்கும் பிள்ளை சலிப்புடன் வாழும்.
4. பெற்ற பிள்ளையிடம் கொள்ளும் சந்தேகம், எமக்கு சஞ்சலத்தையும் அவர்களுக்கு சங்கடத்தையும் தோற்றுவிக்கும் 

                                                              ஆழ்ந்த அன்பு     

                                 ஆழ்ந்த அன்பில்   வீழ்ந்த மனத்தை 

                                 ஆட்டிப் படைக்கும் சோதனை -  அதை 

                                 மீட்டிப் பார்க்க விரும்பாது மனம் 

                                மீண்டும் மீண்டும் ஆழ்ந்த அன்பில் வீழும் 

                                     

புத்தாண்டு வாழ்த்துக்கள்

      

 முடிவென் றுலகில் ஏதும் இல்லை

முடிந்ததாய் எதிலும் சரித்திரம் இல்லை

விடிந்ததும் உலகம் இருள்வது நியதி

இருண்டதும் உலகம் விடிவது உறுதி

மாரியும் ஓர்நாள் கோடையாய் மாறும்

கோடையும் ஓர்நாள் மாரியாய் திரும்பும்

கடந்தது கடந்ததை  நினைப்பது வாழ்வு

நடந்ததை நினைத்தே மாய்வது வீணே

உலகின் பிறப்பில் பலவித மாற்றம்

உணர்ந்தே வளர்தோம் உயர்வை அறிந்தோம்

புதுமை காணவே உழைத்திடும் உலகில்

பழைமை பேணியே புதுமை காண்போம்

மறைந்த பதின் நான்கு பதின் ஐந்தை

மகிழ்வுடன் தந்தே மகிழ்வுடன் பிரிந்தது

கடந்த ஆண்டில் நடந்த நிகழ்வுகள்

கற்றவை நினைத்தே திருந்தி வாழ்வோம்

அனைவருக்கும் இனிய புத்தாண்டு வாழ்த்துக்கள்

கிறிஸ்மஸ் வாழ்த்து

வானத்து விளக்கு வாழ்வின் ஒளி

மேதினியில் உதயம் அன்பு மேலவரின் உலகம்

மானிடம் ஜெயிக்க மானிடர் சிறக்க

மண்ணிலே உதித்தார் மனங்களை வென்றார்

மனங்களை வெல்லும் மனிதங்கள் நிலைக்கும்

காலங்கள் வென்று காலமெல்லாம் வாழும்.

பாலகன் ஜேசு பாரினில் உதித்த

பக்குவம் புரியும் மனங்கள் பண்பினில் உயரும். - அவர் 

பாரினில் பட்டதுயர் பண்புடன் அறிந்தால் 

பாருலகு ஏந்தும் உள்ளத்தால் போற்றியே மகிழும் - அவர்  

பிறப்பின் மேன்மை உணர்த்திடும் உண்மை 

ஏழ்மையும் ஓர்நாள் பாரினில் சிறக்கும் – உலகம்

ஏந்தியே மகிழும் இன்னல்கள் தீர்க்கும்

பிறர்க்காய் வாழும் மனிதர் உலகில் இறப்பதில்லை

தனக்காய்  வாழும் மனிதர் உலகில் நிலைப்பதில்லை

உடல் பொருள் ஆவி உலகுக்காய் தந்தால்

இறை தூதரென உள்ளங்கள் ஏந்தும்

அனைத்து உறவுகளுக்கும் கிறிமஸ் வாழ்த்துக்கள்

சிந்திக்கச் சிலவரிகள்

• ஒருவர் செய்த ஒரு நன்மையை நினைத்து, தீமைகள் அனைத்தையும்         மறக்கும் பண்பே மனிதனை பிறர் மனதில் நிறுத்தும் உயரிய மந்திரம். 

• கவலைகளை துடைத்தெறிந்து வாழ்நாளெல்லாம் சிரித்திருக்கும் கலையை கற்கும் மனிதன் உலக இன்பத்தை பெறும் பாக்கியசாலி ஆவான்.

• அடுத்தவர் பழிப்பார் என்று எண்ணி மனதுக்குள் தோன்றும் உண்மைகளை மறைக்கத் தெரிந்த மனிதன் சமூகத்தை பின்நோக்கிய பாதைக்கு விட்டுச் செல்கின்றான். 

• சொந்தங்கள், சுற்றத்தினர் என்று குறுகிய வட்டத்துக்குள் வாழும் மனிதன் சுயநலவாதப் புழுவாகின்றான். சாதனை படைக்கத் துடிக்கும் மனிதன் சரித்திர நாயகனாகின்றான். 

• ஒரு மனிதன் சேர்க்கும் உயரிய சொத்து உறவுகளின் பாசம். 

• மனிதனின்  அற்புத உறுப்பு மூளை. அதைச் சரியான முறையில் பயன்படுத்தத் தெரியாதவன் அவ்வுறுப்பைப் பெற்றிருக்கும் மூடன்.

• எல்லோரையும் திருப்திப்படுத்தி எல்லோருக்கும் நல்லவராய் வாழ்வது என்பது முடியாத காரியம்.

• தன்னம்பிக்கையும், ஆசையும்  சரியான முறையில் அமையாது விட்டால், தீயவழிக்கே மனிதனைக் கொண்டு செல்லும்.

• எதுவுமே எமக்குச் சொந்தமாவதில்லை. உயிருடன் இருக்கும் வரை அநுபவிப்போம். இல்லாது போனால், சொந்தமில்லை என நினைத்திருப்போம்.

• இன்பமும் துன்பமும் சந்தர்ப்பம் சூழ்நிலைக்கேற்ப அமைகின்றன. சந்தர்ப்பம் வந்து அமைவது சந்திக்கும் மனிதர்களையும் சம்பவங்களையும் பொறுத்தது.

• வாழும்போது யாருடைய நற்குணங்களையும் பிறர் புரிந்து கொள்வதில்லை. இறப்பின் பின்னே நினைத்துத் துன்புறுவர்.

• சுடரின் வீழ்ச்சியும், பகலின் மறைவும், உறக்கத்தின் நிகழ்வும், இடையிடை துன்பமும் கவலையும் உலகின் நிலையாமையை உணர்த்தும்.

                                                             ---- கௌசி -------