தந்தையர் தினம்

அனைவருக்கும் தந்தையர் தின வாழ்த்துகள்
 
தந்தையே எனதருமை தந்தையே
தந்தையே எனதருமை தந்தையே

தோளில் என்னை சுமந்திடவே
கால்கள் மார்பில் உதைத்தனவே
கால்களுக்கு வலுத் தந்து – நான்
வாழ்வதற்கு வழி காட்டிய
தந்தையே எனதருமைத் தந்தையே

விழுந்தவுடன் தூக்கிடாது
எழுந்திருக்க எத்தனிக்கும்
எண்ணத்தினை வளர்த்துவிட்டு – என்
முயற்சிக்கு வழி காட்டிய
தந்தையே எனதருமை தந்தையே

சோர்ந்திடாத குணத்தினாலே
குலங்களையே வாழவைத்தீர் – எதையும்
தாங்குகின்ற மனத்தினராய்
தாழ்வுகளை எதிர்த்து நின்றீர்
தந்தையே எனதருமைத் தந்தையே

ஊருக்காக உழைத்த நெஞ்சம்
யாருக்காக சென்றதுவோ
மறைந்து சென்ற மாயத்தினால் - எங்கள்
மனங்களெல்லாம் தவிக்க வைத்த
தந்தையே எனதருமை தநதையே

சொன்ன சொற்கள் மனமெங்கும்
சோர்வில்லாது நிறைந்திருக்க
சோர்ந்த உங்கள் கண்களையே - இன்றும்
சோர்விலாது தேடுகிறேன்
தந்தையே எனதருமைத் தந்தையே

சொந்தங்கள் சேர்ந்திடலாம்
சொர்க்கத்தையே காட்டிடலாம்
எந்த சொந்தம் அருகிருந்தும் – எந்தன்
தந்தை சொந்தம் போலாமோ
தந்தையே எனதருமைத் தந்தையே