மூன்றெழுத்து

                       

         

உருவாக உடலில் இடம் தந்த

  அன்னைக்கு மூன்றெழுத்து

உதிரத்தைப் பாலாகப் பருகிடும் 

  பிள்ளைக்கு மூன்றெழுத்து

குரலெடுத்து மொழிவடிக்கும் முதல்வார்த்தை

  அம்மா எனும்சொல் மூன்றெழுத்து

அரவணைத்து வளர்த் தெடுக்கும் 

  அப்பாக்கும் மூன்றெழுத்து

இணைந்தே நடத்தும் இல்லறத்தின் 

  அன்புக்கும் மூன்றெழுத்து 

இனிதாக வளர்ந்துவர அறிவூட்டும்

  கல்விக்கும் மூன்றெழுத்து

தென்றலாய் ஓவியமாய்க் கனிந்த – அந்தக்

  கன்னிக்ககு மூன்றெழுத்து – அவள் 

கருத்தினிலே இடம் பிடிக்கும்

  காதலுக்கு மூன்றெழுத்து

கணவனுடன் கச்சிதமாய் வாழ்ந்துவரும் 

  கற்புக்கு மூன்றெழுத்து – அவள்

கூந்தலிலே காட்சி தரும்

  மலருக்கு மூன்றெழுத்து – அது

நாசி நுழை இன்பம் தரும்

  மணத்திற்கு மூன்றெழுத்து

மணம் தரும் மலரணிந்து செல்லும்

  கோயிலுக்கு மூன்றெழுத்து – அங்கு

மன்றாடி மனமுருகி வேண்டிநிற்கும்

  அருளுக்கு மூன்றெழுத்து

அருளோடு சிறப்பாய் வாழத் துணையாகும்

  தொழிலுக்கு மூன்றெழுத்து

தொழிலால் வாழ்வால் சிறப்பால் கிடைக்கும்

  புகழுக்கு மூன்றெழுத்து

புகழுடம்பு மண்ணில் மாள இறையடிநாடும்

  உயிருக்கு மூன்றெழுத்து

உயிரற்று தீக்கு இரையாகும்  இந்தக்

  கட்டைக்கு மூன்றெழுத்து

கட்டையைச் சுமந்து செல்லும் 

  பெட்டிக்கு மூன்றெழுத்து

அது உருவாக உயிர் தந்த

  மரத்துக்கு மூன்றெழுத்து

மரப்பெட்டியில் அடக்கமாகிய உயிரடையும்

  நிலத்துக்கு மூன்றெழுத்து

பிறப்புத் தொடங்கி இறப்பு வரை – மனிதனுடன்

  தொடர்ந்து வரும் மூன்றெழுத்து